2024-nji ýylda geofizikler «Türkmengaz», «Türkmennebit» döwlet konsernleriniň we «Türkmengeologiýa» döwlet korporasiýasynyň degişli bolan 245 guýusynda iş alyp bardylar diýip, Türkmenistanyň nebitgaz toplumynyň «Nebit-Gaz» gazeti habar berýär.

Geçen ýyl Balkan welaýatyndaky Goturdepe we Barsagelmez nebit ýataklarynda işler geçirildi. Goturdepe ýatagyndaky ulanyş guýularynyň birinde geçirilen partlaýjy işler onuň öndürijiligini ýokarlandyrdy, şeýle hem «Galkynyş» gaz ýatagynyň guýularynda oňyn netijeler gazanyldy.

2024-nji ýylda geofizikler Mary welaýatyndaky gazyp alýan dolandyryş edaralarynda guýularyň tehniki ýagdaýyny we öndürijiligini kesgitlemek işlerini tamamladylar.

Şu ýyl geofizikler Mary welaýatyndaky Garaşsyzlygyň 10 ýyly, Ýolguyy, Gündogar, Günbatar Şatlyk gaz ýataklarynyň we Döwletabat ýataklar toparynyň guýularynda iş alyp barmagy meýilleşdirýärler.

Ýylyň meýilnamasynda döwrebap geofizika enjamlaryny ulanmak bilen ulanyş we gaz gözleg guýularynda monitoring işleri bar.

ORIENT