Iki diplom maksatnamalar we IELTS synagyň girizilmegi: Türkmenistanyň Bilim ministrligi bilen britan wekiliýetiniň arasynda duşuşyk

11.11.2024 | 18:00 |

11-nji noýabrynda Türkmenistanyň Bilim ministrliginde Türkmenistanyň Bilim ministriniň orunbasary A.Ataýew bilen Daşkent şäherindäki Beýik Britaniýanyň konsullygynyň müdiri Denisa Woddingemiň ýolbaşçylygyndaky britan wekiliýetiniň arasynda duşuşyk geçirildi. Bu barada Türkmenistanyň Bilim ministrliginiň metbugat gullugy habar berýär.

Taraplar bilim ulgamynda ikitaraplaýyn hyzmatdaşlygyň geljegini we ugurlaryny, şol sanda Türkmenistanyň bilim edaralarynda okatmagyň öňdebaryjy usullaryny ornaşdyrmak we iňlis dilindäki maksatnamalary ösdürmek bilen bagly meselelerini ara alyp maslahatlaşdylar.

Duşuşykda ara alnyp maslahatlaşylan meseleleriň arasynda Türkmenistanda IELTS (bu iňlis dili boýunça bilim derejesini bahalandyrmak üçin döredilen halkara synag ulgamy) synaglaryny guramak babatda hem pikir alyşyldy. IELTS 11,000-den gowrak gurama, şol sanda uniwersitetler, iş berijiler, hökümet we ýörite edaralar tarapyndan netijeleri kabul edilýän dünýäde has ýokary ykrar edilen synaglaryň biridir.

Iki ýurduň ýokary okuw mekdepleriniň arasynda, şol sanda iki diplom maksatnamalar babatda hyzmatdaşlygy ösdürmek meselesinde hem durup geçildi.

Taraplar uzak möhletli hyzmatdaşlygy ösdürmäge we bilim ulgamynda öňdebaryjy tejribe alyşmaga özara gyzyklanmalaryny nygtadylar.

ORIENT News