Hytaý 6G emeli hemrasyny uçurdy

27.02.2024 | 09:05 |

Hytaý Ýer orbitasyna iki sany synag hemrasyny uçuryp, indiki nesil aragatnaşyk ulgamyny ýola goýmakda ilkinji ädimlerini atýar, diýip China Global Television Network (CGTN) habar berýär.

Emeli hemralaryň birinjisi-China Mobile01 5G operasion ulgamynda işleýän enjam bilen üpjün edildi, ikinji emeli hemra- Xinghe-de bolsa, geljekki 6G ulgamy üçin niýetlenen özbaşdak enjam ornaşdyryldy.

Bilermenleriň aýtmagyna görä, 6G ulgamy 2030-njy ýyldan bärde giň ulanylyşa girizilmez.

Scientific American žurnaly 6G-niň maglumat geçirijilik tizligi 5G-den 10-1000 esse köp bolar diyip habar berýär. Munuň özi bir sekuntda terabitlerçe möçberdäki maglumaty ýüklemek diýmekdir, şeýle hem bu tehnologiýa köp ugurlarda ösüşi höwesledirer.

5G-niň ornaşdyrylmagy 2020-nji ýyllaryň telekommunikasiýalaryny kesgitledi, 6G bolsa 2030-njy we ondan aňyrky ýyllaryň tehnologiýasy bolar.

ABŞ-da 5G-niň köpýyllyk ornaşdyrylmagyndan soňra, 2030-njy ýyla çenli amerikalylaryň 91% 5G ulgamyna birikdiriler.

6G-ni ilkinji ornaşdyranlar tehnologik artykmaçlyklara eýe bolarlar, şoňa görä-de ýurlar bu ulgamda birinjilik ugrunda özara bäsleşýärler.