Türkmenistanyň Energetika ministrliginiň we Döwlet energetika institutynyň wekilleri ÝHHG-niň Aşgabatdaky merkezi tarapyndan guralan iki günlük okuw-tanyşlyk sapary bilen Barselona şäherine bardylar. 2026-njy ýylyň 26-27-nji maýynda geçirilýän çäreleriň maksatnamasy gaýtadan dikeldilýän energetika pudagynyň durnuklylygyny ýokarlandyrmak we innowasion tehnologik çözgütleri ornaşdyrmak ulgamynda öňdebaryjy ýewropa tejribesini öwrenmäge gönükdirilendir.

Saparyň birinji gününde türkmen hünärmenleri Kataloniýanyň politehnik uniwersitetiniň Gözleg merkezinde (CITCEA-UPC) baryp gördüler. Ispan kärdeşleri bilen geçirilen çuňňur ara alyp maslahatlaşmalaryň dowamynda esasy üns energetika geçişini meýilleşdirmegiň gurallaryna, paýlanylan generassiýanyň durnuklylygyna, islegleri dolandyrmaga we döwrebap energetika ulgamlaryndaky tehnologik töwekgelçiliklere taýýarlyga berildi. Gaýtadan dikeldilýän energiýa çeşmelerini intellektual torlara (Smart Grids) birleşdirmegiň amaly taraplary aýratyn hünär gyzyklanmasyny döretdi.

ÝHHG-niň (OBSE) Aşgabatdaky merkeziniň ykdysady-ekologiýa bölüminiň başlygy Oliwra Zurowak-Kuzmanyň bellemegine görä, bu başlangyjyň esasy maksady ÝHHG-niň amaly gurallaryny özleşdirmek arkaly türkmen hünärmenleriniň hünär derejesini ýokarlandyrmakdan we degişli ýokary okuw mekdebiniň akademiki mümkinçiliklerini giňeltmekden ybaratdyr.

Saparyň ikinji gününiň maksatnamasy türkmen wekiliýetiniň Kataloniýanyň politehnik uniwersitetiniň ýanyndaky Wodorody barlamak baradaky ýöriteleşdirilen merkeziniň bilermenleri bilen duşuşmagyny göz öňünde tutýar. Taraplar megapolisleriň energetika durnuklylygynyň möhüm meseleleri, ýerli energetika bileleşikleriniň işleyişi we «akylly» şäherlerde energiýa sarp edilişini dolandyrmak boýunça mazmunly pikir alyşmalary geçirerler. Mundan başga-da, gatnaşyjylar senagat elektronikasynyň we energiýa üpjünçiliginiň bökdençsizligini üpjün etmegiň täze çemeleşmelerine serederler, bu bolsa Türkmenistanda amala aşyrylýan infrastrukturany döwrebaplaşdyrmagyň milli maksatnamalary üçin uly amaly ähmiýete eýedir.