5-nji iýunda, Aşgabatda geçiriljek “TurkmenTextile Expo 2026” halkara sergisiniň ikinji iş gününde, onuň işewürlik maksatnamasy dokma işewürliginiň gerimini giňeltmäge gönüden-göni täsir edýän strategik meselelere: eksport, netijeli logistika we abraýly halkara laýyklyk sertifikatlaryny almaga gönükdiriler.

Şu günki günde daşary ýurtlaryň premium bazarlaryna üstünlikli çykmak diňe bir ýüplügiň ýa-da taýýar geýimleriň hili bilen kesgitlenilmeýär. Çig malyň ekologiýa taýdan arassalygy, üpjünçilik zynjyrynyň aýdyňlygy we durnukly ösüş maksatlarynyň (ESG) berk berjaý edilmegi esasy şertlere öwrülýär. Guramaçylar forumyň ikinji gününi hut şu amaly gurallara bagyşladylar.

“Better Cotton” standartlarynyň ornaşdyrylmagy we tygşytly önümçilik

Irdenki bölüm sagat 11:00-dan 13:00-a çenli dowam eder. Ol «Durnukly pagtaçylyk we Better Cotton sertifikatlaşdyrmasy» atly amaly okuw maslahaty bilen açylar. Esasy spiker hökmünde Täjigistandan gelen öňdebaryjy sebit bilermeni Tahmina Saýfulloýewa çykyş eder.

Sessiýanyň gatnaşyjylary “Better Cotton” ulgamynyň esasy ýörelgelerini, daýhan hojalyklaryna we gaýtadan işleýän kärhanalara bildirilýän esasy talaplary, şeýle hem süýümiň gelip çykyşyny yzarlamagyň döwrebap usullaryny jikme-jik seljererler. Dünýäniň iň iri brendleri bilen şertnamalary baglaşmaga ýol açýan bu ählumumy standartyň üstünlikli ornaşdyrylmagyna we türkmen kärhanalarynyň audite ädimme-ädim taýýarlyk görmegine aýratyn üns berler.

Merkezi Aziýa üçin eksport logistikasy

Maksatnamanyň öýlänki bölümi sagat 14:00-dan 16:00-a çenli meýilleşdirilen «Merkezi Aziýadan dokma söwdasy üçin eksport logistikasyny guramak» atly amaly maslahat bilen dowam eder.

Bu interaktiw sessiýanyň çäklerinde bilermenler we işewürligiň wekilleri ulag geçelgelerini kämilleşdirmek boýunça hakyky tejribeleri seljererler. Üns merkezinde — üýtgeýän bazaryň şertlerinde multimodal gatnawlary guramagyň amaly usullary, dürli döwletleriň gümrük zolaklarynyň aýratynlyklary bilen işlemek we dokma kärhanasyndan ahyrky alyja çenli bolan ýolda çykdajylary azaltmak meseleleri bolar.

Senagaty döredijilerden GOTS we OEKO-TEX dünýä standartlary

Iş gününiň iň ýokary nokady sagat 16:00-da başlanjak «Pagta we dokma pudaklarynda durnukly ösüş we hil sertifikatlaşdyrmasy» atly eksklýuziw seminar bolar. Bu bölümiň özboluşlylygy çagyrylan spikerleriň derejesindedir — bular onlarça ýyllap halkara ekologiýa standartlaryny kemala getirip gelýän ykrar edilen ýewropaly bilermenlerdir.

Gatnaşyjylaryň öňünde Germaniýanyň “SYNBELLE GmbH” maslahat beriş kompaniýasyny esaslandyryjysy we dolandyryjy direktory Karola Diners (Carola Dieners) çykyş eder. Dokma inženerçiligi ulgamynda düýpli bilimi we MBA derejesi bolan K.Diners uzak wagtlap “OEKO-TEX®” we “PKZ” ýaly guramalarda ýolbaşçy wezipelerinde işledi. Bilermen ýeňil senagat üçin sanly çözgütler we “CSR” strategiýalaryny ornaşdyrmak boýunça ýöriteleşendir, häzirki wagtda bolsa işewürlere “amfori”, “Fair Wear” we “OEKO-TEX®” talaplaryna uýgunlaşmak boýunça maslahat berýär.

Sessiýanyň ikinji esasy spikeri Katarina Şaus (Katharina Schaus) bolar — ol durnukly dokma ulgamynda 30 ýyldan gowrak tejribesi bolan abraýly hünärmendir. Ol dünýä derejesindäki “Global Organic Textile Standard” (GOTS) standartynyň döredilmegine gatnaşanlaryň biri we bu standartyň Ýewropadaky ýeke-täk tassyklanan maslahatçysy hökmünde tanalýar. Katarina Şaus bütin dünýäde, şol sanda Merkezi Aziýa ýurtlarynda ýüzlerçe şowly ekologiýa auditlerini geçirdi we sebitiň önümçilik aýratynlyklary bilen ýakyndan tanyşdyr.

Işewürlik üçin amaly ähmiýeti

Guramaçylar ähli sessiýalaryň öndürijileriň öňünde duran anyk wezipeleriň esasynda guralandygyny nygtaýarlar. Çärelere gatnaşmak dokma kärhanalarynyň wekillerine esasy soraglara jogap almaga mümkinçilik berer:

— Eksporta kepillikli çykmak üçin haýsy berk talaplary ýerine ýetirmeli;

— Iri halkara söwda torlary bilen işleşmek üçin hakykatda haýsy ekologiýa we durmuş ugurly sertifikatlary talap edilýär;

— Nähili edip aýdyň, durnukly we ykdysady taýdan netijeli üpjünçilik zynjyryny gurmaly;

— Işewürligiň girdejiligini ýitirmezden, önümçilige “ýaşyl” tejribeleri nähili ornaşdyrmaly.

“TurkmenTextile Expo 2026” adaty hasabat beriş formatyndan bilgeşleýin daşlaşyp, işewürlik maksatnamasyny ählumumy bazara gönükdirilen kompaniýalar üçin hakyky iş guralyna öwürýär.