AŞGABAT, 11-nji aprel — Türkmenistanyň paýtagtynda köpçülikleýin sport baýramy — «Dostluk ganatlary: ÝB × Türkmenistan» atly ylgamak ýaryşy geçirildi. Bu çäre Ýewropa güni we Bütindünýä Saglyk güni mynasybetli guraldy.

Çäre Ýewropa Bileleşiginiň Türkmenistandaky wekilhanasy tarapyndan, Bedenterbiýe we sport baradaky döwlet komiteti hem-de Aşgabat şäher häkimligi bilen bilelikde, ýurdumyzyň Daşary işler ministrliginiň we «Run Rush» ylgamak jemgyýetiniň goldaw bermeginde geçirildi.

Ylgamak ýaryşy 650-den gowrak gatnaşyjyny jemläp, açyklyk, inklýuziwlik we sport arkaly agzybirlik ruhuny döretdi. Bu başlangyç 2025-nji ýylda geçirilen "Parahatçylyk we ynanyşmak marafonynyň" tejribesiniň dowamy bolup, bu gezek ilatyň has giň gatlagyny çekmäge gönükdirilen täzelenen görnüşde geçirildi.

Guramaçylar sportyň hyzmatdaşlygy berkitmekde we jemgyýetçilik agzybirligini ösdürmekde möhüm guraldygyny aýratyn belleýärler. Şeýle çäreler özara hormat goýmak, raýdaşlyk we sagdyn durmuş ýörelgelerini wagyz etmäge ýardam berýär.

Ylgamak ýaryşy Aşgabadyň Garaşsyzlyk seýilgähinde geçirildi. Gatnaşyjylara dürli kategoriýalar hödürlendi: 2 km-lik maşgala ylgawy, inklýuziw ylgaw, şeýle hem höwesjeňler we taýýarlykly türgenler üçin 5 we 10 km aralyklar.

Çäräniň maksatnamasy açylyş dabarasy we umumy maşklar bilen başlandy, soňra bolsa aýratyn badalgalar berildi. Myhmanlar üçin her dürli güýmenje we maşgala çäreleri guraldy.

Pellehana ýeten gatnaşyjylaryň ählisine ýadygärlik medallar gowşuryldy, ýeňijilere bolsa hyzmatdaşlar tarapyndan ýörite baýraklar berildi.

«Dostluk ganatlary» atly ylgamak ýaryşy Ýewropa Bileleşigi bilen Türkmenistanyň arasyndaky netijeli hyzmatdaşlygyň nobatdaky subutnamasy bolup, sportyň jemgyýetçilik gatnaşyklaryny berkitmekdäki uly mümkinçiliklerini açyp görkezdi.

ORIENT