Penşenbe güni Hytaýyň günortasyndaky Çžuszýan derýasynyň üstünden geçýän uly Şiszýan köprüsiniň iki sany esasy direginiň gurluşygy üstünlikli tamamlanyldy. Bu bolsa iki gatly asma köprüler üçin täze dünýä rekordyny goýdy; köprüniň her bir direginiň beýikligi 110 gatly ýaşaýyş jaýynyň beýikligine barabardyr.

Bu köprüniň gurluşygy, ozal tamamlanan Gonkong-Çžuhaý-Makao we Şençžen-Çžunşan köprülerinden soňra, Guandun-Gonkong-Makao Uly aýlag sebitindäki ýene bir infrastruktura ägirt uly taslamasy bolan Şiszýan kanalynyň möhüm bölegi bolar.

Her biriniň beýikligi 342 metr bolan iki sany esasy direg gurluşygynyň tamamlanmagy, köprüniň gurluşygynyň üstki gurluşy dikeltmek tapgyryna geçendigini aňladýar. Meýilnama laýyklykda, Şiszýan kanaly 2029-njy ýylyň birinji ýarymynda ulanmaga taýýar bolar.

Köprüniň gurluşygynyň bütin dowamynda sanly dolandyryş ulanyldy: Hytaýyň «BeiDou» geolokasiýa gullugy ýokary takyklykda ýerleşişi kesgitlemegi üpjün etdi, direglerdäki akylly datçik ulgamy bolsa galdyrmak, barlag we gözegçilik amallaryny bitewi görnüşde ýerine ýetirmäge mümkinçilik berdi. Diňli kranlar, galyplar we beton guýmak işleri awtomatlaşdyryldy, bu bolsa millimetre çenli takyklygy üpjün edýär.

Köprüniň esasy polat tanapy 125 900 tonna çenli güýje çydaýar, bu bolsa on iki sany Eýfel diňini galdyrmak üçin ýeterlikdir. Esasy tanapy emele getirýän 374 sany örümiň her biri içki çyglylygy, temperaturany we dartylmany hakykyu wagt ýagdaýynda yzarlaýan akylly simlerden ybaratdyr.

Diňlerden başga-da, köprüniň esasy aralygynyň uzynlygy 2180 metr, esasy tanapynyň diametri 1,5 metr, berkidiji guralynyň diametri 130 metr bolar. Şeýle hem köpri jemi 16 hatarly ulag ýoluna niýetlenen iki gatly gurluşa eýedir.