Nowruz baýramy mynasybetli Türkmenistanyň Döwlet sirki bahar paslyna we tebigatyň janlanmagyna bagyşlanan ýörite tomaşa maksatnamasyny taýýarlady. Baýramçylyk çykyşlary 23–28-nji mart aralygynda Aşgabat şäherinde geçiriler.

Maksatnama «Galkynyş» milli at üstündäki oýunlar topary hem-de «Türkmen jigitleri» ýaly belli toparlaryň gatnaşmagynda geçiriler. Tomaşaçylar birnäçe gezek halkara meýdançalarynda çykyş eden ahalteke bedewleriniň gatnaşmagynda täsirli çykyşlary görerler.

Şeýle hem sahnada žonglýorlar, akrobatlar we ekwilibristler çykyş eder. Howa gimnastlary sirk gümmeziniň astynda çylşyrymly tilsimleri ýerine ýetirerler, baýramçylyk ruhuny döretmek we tomaşaçylar bilen gatnaşygy üpjün etmek bolsa eksentrik masgarabazlaryň paýyna düşer.

Alty gün dowam etjek maksatnama ýazky dynç alyş günlerinde paýtagtda geçiriljek baýramçylyk çäreleriniň biri bolup, çagalar hem-de uly ýaşly tomaşaçylar üçin gyzykly bolar.

Çykyşlar her gün geçiriler. Tomaşalaryň başlanýan wagty we biletler baradaky maglumatlary Türkmenistanyň Döwlet sirkiniň kassalaryndan ýa-da şu telefon belgileri arkaly alyp bolýar: 39-80-44, 39-80-45, 39-80-46, 36-10-95.