Aşgabadyň «Arçabil» myhmanhanasynda «Türkmenistan–Hytaý: Zenanlar we jemgyýet» atly tegelek stol geçirildi. Hytaý Halk Respublikasynyň Ilçihanasy tarapyndan guralan bu duşuşyk, zenanlaryň başarnygynyň iki ýurduň ykdysadyýetini we medeniýetini nähili özgerdýändigi baradaky çuňňur dialoga öwrüldi.
HHR-iň Ilçihanasynyň işlerini wagtlaýyn ynanylan wekili hanym Çžun Hua gatnaşyjylaryň öňünde çykyş edip, häzirki zaman Hytaý baradaky düşünjeleri özgerdýän täsirli maglumatlary getirdi. Şu günki günde hytaýly zenanlar — bu diňe bir ojagyň goragçylary bolman, eýsem ösüşiň güýçli hereketlendirijisidir. Çykyşda aşakdaky görkezijiler bellenilip geçildi:
80 ýaş — HHR-iň zenanlarynyň ortaça ömür dowamlylygy;
Ýurduň ähli ylmy-tehniki işgärleriniň 46%-i — zenanlar;
Internet tehnologiýalary pudagyndaky telekeçileriň 50%-den gowragy hem zenanlardyr.
«Hytaýda şeýle diýilýär: zenanlar asmanyň ýarysyny saklaýarlar. Bu biziň mümkinçiliklerimiziň çäksizdigini aňladýar: erkekleriň edip bilýän işlerini zenanlar hem başaryp bilerler» — diýip, hanym Çžun Hua aýratyn belledi.
Hanym Çžun Hua, Gurbanguly Berdimuhamedow adyndaky Howandarlyga mätäç çagalara hemaýat bermek boýunça hyýar-sahawat gaznasynyň bejeriş işleri boýunça wise-prezidenti Oguljahan Atabaýewanyň ýolbaşçylygyndaky wekiliýetiň Hytaýa bolan saparynyň ähmiýetini aýratyn belledi. Geçen ýylyň awgust aýynda bolan bu sapar çagalaryň hukuklaryny goramak we eneligi goldamak babatda hyzmatdaşlyga güýçli itergi berip, Ählihytaý zenanlar federasiýasy bilen türkmen guramalarynyň arasyndaky gatnaşyklary berkitdi.
Hytaý dünýäniň zenanlarynyň herketini iş ýüzünde goldamaga taýýardygyny tassyklady: ýakyn 5 ýylyň dowamynda Pekin 50 müň aýal-gyzlary okuw kurslaryna çagyrar we 1000 sany ýerli durmuş taslamasyny işe girizer.
Soňra Türkmenistanyň Zenanlar birleşiginiň Merkezi geňeşiniň başlygy Oguljennet Berdiliýewa çykyş etdi, şondan soňra agşamlyk naharyndaky dialog üstünlikli taryhlarynyň özboluşly bir jemlemesine öwrüldi.
Çykyşlaryň temalary özüniň gerimi bilen haýran galdyrdy: milli keşdeçilik sungatynyň inçe tärlerini gorap saklamakdan (Jennet Agaýewa) başlap, raýat awiasiýasynda asmany özüne bendi etmäge (Laçyn Dädekowa) çenli. Türkmen zenan alymlary, mugallymlary we işewür zenanlary Türkmenistanda täzelikleriň milli ruhy gymmatlyklar bilen sazlaşykly utgaşýan özboluşly nusgasynyň döredilendigini görkezdiler.
Duşuşygyň çäklerinde hanym Çžun Hua ORIENT-iň okyjylaryna mähirli gutlag bilen ýüzlendi:
«Men ähli türkmen zenanlaryna bahar paslynyň ruhybelentligini, ýüzleriniň elmydama ýylgyryp durmagyny hem-de ojaklarynda parahatçylygyň we agzybirligiň höküm sürmegini arzuw edýärin».
Muňa jogap edip, ORIENT-iň redaksiýasy hytaýly zenan diplomatlaryň özleriniň işjeňligi, mydama gözelligini we güýjüni saklap bilmek ukyby bilen haýran galdyrýandyklaryny aýratyn belledi.
