Hytaý Halk Respublikasynyň Başlygy Si Szinpin şu gün, 14-nji fewralda, Pekinde geçirilen dabaraly duşuşykda ähli hytaý halkyny ýetip gelýän Bahar baýramy (Çunsze, ýagny Aý senenamasy boýunça milli hytaý Täze ýyly) bilen gutlady.

Pekindäki Halk ýygnaklary öýünde çykyş eden şol bir wagtda HKP MK-nyň Baş sekretary we Merkezi harby geňeşiň başlygy hökmünde Si Szinpin HKP MK-nyň we HHR-niň Döwlet geňeşiniň adyndan ýurduň köp milletli halkyny, Sýangan we Aomendäki hem-de Taýwandaky watandaşlaryny, şeýle hem daşary ýurtlarda ýaşaýan hytaýlylary ýetip gelýän baýram bilen gutlady.

Tamamlanyp barýan Ýylan ýylyny adaty bolmadyk ýyl hökmünde häsiýetlendiren hytaý lideri, Hytaýyň tutanýerlilik we erjellik bilen öňe barandygyny, partiýanyň we döwletiň işinde täze üstünlikleri we gazananlaryny üpjün edendigini nygtady. Ýurduň ykdysady kuwwaty, ylmy-tehniki mümkinçilikleri, goranyş ukyby we umumy milli güýji täze derejelere ýetdi, hytaý aýratynlyklaryndaky döwrebaplaşdyrma bolsa öňe tarap nobatdaky möhüm ädimi ätdi.

Çykyşynda Si Szinpin geçen ýylyň dowamynda has işjeň makroykdysady syýasatyň alnyp barylandygyny, giň gerimli özgertmeleriň ilerledilendigini we häzirki zaman senagat ulgamyny döretmekde möhüm öňegidişligiň gazanylandygyny aýtdy. Hytaý ykdysadyýeti basyşlara garamazdan ösüşini dowam etdirdi we güýçli durnuklylygyny hem-de ýaşaýşa ukyplylygyny görkezdi.

Hytaý lideri adamlaryň abadançylygynyň ýokarlanandygyny we jemgyýetçilik durnuklylygynyň üpjün edilendigini belledi. Şu ýyl HKP-niň döredilmeginiň 105 ýyllygy bellenilýär hem-de 15-nji bäşýyllygyň ilkinji ýyly başlanýar. Şunuň bilen baglylykda, ol HKP MK-nyň 20-nji çagyrylyşynyň 4-nji plenumynyň çözgütleriniň ýerine ýetirilmegine, ýokary hilli ösüşe üns berilmegine we ýurduň syýasy durmuşyndaky indiki möhüm döwrüň üstünlikli başlanmagyna çagyrdy.

"Hytaý medeniýetinde at güýç-kuwwatyň we üznüksiz özüni kämilleşdirmegiň nyşany bolup, durnukly we uzak möhletleýin ösüşiň hem-de rowaçlygyň geljegini alamatlandyrýar. Men Ýylky ýylynda ýurduň köp milletli halkynyň Merkezi Komitetiň partiýasynyň töwereginde has jebis birleşjekdigine, berk ynamy we ýokary ruhubelentligi saklap, hytaý aýratynlyklaryndaky döwrebaplaşdyrmanyň täze ýolunda batyrgaý öňe gitjekdigine we bilelikde has ýagty geljegi döretjekdigine umyt edýärin. Sözümiň ahyrynda hemmäňize berk jan saglyk, işiňizde üstünlik, maşgala abadançylyk we Ýylky ýylynda rowaçlyk arzuw edýärin", — diýip Si Szinpin aýtdy.

Çärä beýleki partiýa we döwlet ýolbaşçylary — Li Sýan, Çžao Leszi, Wan Hunin, Sýaý Si, Din Sýuesýan, Li Si we Han Çžen, şeýle hem jemgyýetiň dürli gatlaklarynyň 2000-den gowrak wekili gatnaşdy.

Bahar baýramy, ýa-da Aý senenamasy boýunça hytaý Täze ýyly, hytaý halky üçin iň möhüm milli baýramçylykdyr. Şu ýyl ol 17-nji fewrala gabat gelýär.