Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Hytaýyň daşary işler ministri Wan Ýi hepdäniň sişenbe güni eden çykyşynda, 2025-nji ýylda Hytaýyň dünýä döwletleri bilen gatnaşyklarynyň has oňyn ugurda ösýändigini, ýurduň halkara derejede ornunyň berkeýändigini hem-de ýolbaşçylyk ukyplarynyň artandygyny belledi.
Bu barada Hytaýyň Kommunistik Partiýasynyň Merkezi Komitetiniň Syýasy býurosynyň agzasy bolan Wan Ýi, 2025-nji ýylda halkara ýagdaýy we Hytaýyň daşary syýasaty boýunça geçirilen simpoziumda çykyş edende aýtdy.
Wan Ýi, dünýäde dowam edýän dartgynly ýagdaýlarda Hytaý döwleti durnuklylygyň daýanjy we ählumumy ösüş meselelerini çözmekde hem-de halkara adalatlylygy goramakda öňdebaryjy güýç hökmünde çykyş edýändir diýip, belledi.
Wan Ýi halkara ýagdaýlaryň möhüm öwrülişik derejesine ýetendigini, birtaraplaýynlyk we agalyk edijilik synanyşyklarynyň ähmiýetiniň peselýändigini hem-de dünýäde köptaraplylyk ýörelgeleriniň kemala gelýändigini belledi.
Şeýle hem ol, Hytaý bilen Amerikanyň Birleşen Ştatlarynyň gatnaşyklaryny häzirki wagtda dünýäde iň möhüm ikitaraplaýyn gatnaşyklaryň biri hökmünde häsiýetlendirip, birek-birege hormat goýmak, bilelikde parahatçylykly ýaşamak we özara bähbitli hyzmatdaşlyk etmek dünýä abadançylygy üçin esasy şertlerdigini aýtdy.
Taýwan meselesine degip geçmek bilen Wan Ýi, Taýwanyň öz watanyna dolanyp gelmegine 80 ýyl bolandygyny aýdyp, milli bitewiligi doly üpjün etmek Hytaýyň özygtyýarlylygyny we çäk bitewiligini goramak boýunça kanuny hem-de taryhy borçdugyny belledi.
Şeýle-de ol Ýaponiýada militarizmiň täzeden güýçlenýändigini bellemek bilen, uruşdan soňky halkara tertibini üýtgetmek synanyşyklaryndan saklanmaga çagyrdy hem-de gazanylan parahatçylygy we durnuklylygy goramagyň möhümdigini aýtdy.
Wan Ýi geljekde hem Hytaýyň özboluşly aýratynlyklaryna laýyk bolan uly döwlet diplomatiýasynyň mundan beýläk-de ösdüriljekdigini, goňşy ýurtlar we Ählumumyl Günorta bilen hyzmatdaşlygyň pugtalandyryljakdygyny, dünýäde aç-açanlygy we halkara dolandyryş ulgamyny kämilleşdirmeklik öňe sürüljekdigini aýtdy.