Köne gün panellerini nädip gymmatly serişdä öwürmeli we näme üçin Koreýanyň galyndylary täzeden işlemek nusgasy dünýäde iň täsirli hasaplanýar? Hut şu soraglar Türkmenistan we Gazagystan ekologlaryny hem-de Gündogar Aziýanyň tehnologiýa ägirtlerini birleşdiren webinaryň esasy temasy boldy.

Aşgabat, 22-nji dekabr | ORIENT. Merkezi Aziýa ekologiýa ulgamynda ýokary tehnologiýaly çözgütleri ornaşdyrmaga gönükdirilýär. Gün tertibinde — çylşyrymly galyndylary gaýtadan işlemek boýunça dünýäde öňdebaryjy hasaplanýan Günorta Koreýanyň tejribesi bar diýip, Merkezi Aziýa Sebitl Ekologiýa Merkeziniň (CAREC) resmi saýtynda habar berilýär. Gatnaşyjylaryň aýratyn ünsüni ulanylan gün batareýalaryny gaýtadan işlemek tehnologiýasy özüne çekdi. Merkezi Aziýada täzelenýän energetikanyň çalt ösýän şertlerinde bu mesele strategik ähmiýete eýe bolýar.

95% netijelilik: Günorta Koreýanyň ulgamlary peýdaly materiallaryň — alýuminiý, aýna we seýrek metallar ýaly serişdeleriň doly möçberini gaýtadan almaga mümkinçilik berýär.

Eko-peýda: Gaýtadan işlemek prosesi diňe bir serişdeleri önümçilige gaýtaryp bermek bilen çäklenmän, CO₂ zyňyndylaryny hem möhüm derejede azaldýar.

CAREC-yň Türkmenistandaky taslama edarasynyň direktory Mergen Kepbanow koreý çemeleşmesiniň özüne çekijiligini onuň pragmatik häsiýeti bilen düşündirdi:

«Günorta Koreýanyň tejribesini iň ýokary tehnologiýaly we şol bir wagtyň özünde ykdysady taýdan amatly nusga hökmünde öwrenmek zerurdyr. Biziň sebitimiz üçin bu hakyky sirkulýar ykdysadyýete tarap möhüm ädimdir».

Merkezi Aziýa Sebit Ekologiýa Merkezi (CAREC) bu tehnologiýalaryň transferi üçin “köpri” wezipesini ýerine ýetirýär. CAREC-yň Gazagystandaky edarasynyň direktory Ýerlan Žumabaýew nemes hyzmatdaşlar bilen alnyp barylýan taslamalary gündogar innowasiýalary bilen doldurmak arkaly hyzmatdaşlaryň sanyny giňeltmäge taýýardygyny belledi.

Gibrid gün-ýel elektrik stansiýalaryny gurýan Türkmenistan üçin şeýle galyndylary täzeden işlemek ulgamlaryny ornaşdyrmak — energiýa önümçiliginiň “arassa” aýlawyny ilkinji ädimlerden başlap döretmek we geljekde ekologiýa zyýanynyň ýygnanmagynyň öňüni almak üçin uly mümkinçilikdir.