Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Aşgabat, 12-nji dekabr | ORIENT. Türkmenistanyň Prezidenti Serdar Berdimuhamedow Halkara parahatçylyk we ynanyşmak forumynyň çäginde Türkiýe Respublikasynyň Prezidenti Rejep Taýyp Ärdogan bilen duşuşdy. Gepleşikler Türkmenistanyň uzak möhletleýin gatnaşyklara gönükdirilen Türkiýe Respublikasy bilen strategik hyzmatdaşlygy giňeltmek ugrundaky işlere berk ygrarlydygyny tassyklady.
Prezident Serdar Berdimuhamedow ýokary wekilçilikli foruma hut Rejep Taýyp Ärdoganyň özüniň gatnaşmagynyň Türkmenistanyň Bitaraplyk syýasatyny goldaýandygyny we Türkiýäniň parahatçylyk ýörelgelerine berýän uly ähmiýeti görkezýändigini nygtady.
Prezident Rejep Taýyp Ärdogan bildirilen myhmansöýerlik üçin hoşallygyny beýan edip, Türkiýede Türkmenistanyň alyp barýan parahatçylyk söýüjilikli daşary syýasatyna we ähli ulgamlarda gazanýan üstünliklerine ýokary baha berilýändigini aýtdy.
Prezident Serdar Berdimuhamedow Türkiýäniň Baştutanynyň saparynyň netijeleriniň ikitaraplaýyn gatnaşyklaryň giňeldilmegine täze itergi berjekdigine berk ynam bildirdi.
Iki ýurdy köpasyrlyk dost-doganlyk gatnaşyklary baglanyşdyrýar. Bu bolsa ýokary derejede alnyp barylýan döwletara dialogy has-da çuňlaşdyrmak üçin berk esas bolup hyzmat edýär.
Duşuşykda Türkiýe Respublikasynyň Türkmenistanyň esasy söwda-ykdysady hyzmatdaşlarynyň biridigi nygtaldy.
Döwlet Baştutanlary ýangyç-energetika, ulag-aragatnaşyk, oba hojalygy we maýa goýum ýaly ileri tutulýan ugurlarda konstruktiw hyzmatdaşlygy ösdürmek üçin giň mümkinçilikleri bellediler.
Bellenilişi ýaly, bu ugurlardaky hyzmatdaşlyk ikitaraplaýyn we sebitleýin derejede ösdürilmelidir.
Söhbetdeşler şeýle hem iki ýurduň doganlyk halklarynyň arasynda medeni-ynsanperwer dialogy yzygiderli giňeltmegiň möhümdigini ara alyp maslahatlaşdylar.
