Sankt-Peterburg halkara ykdysady forumynyň meýdançasynda Ykdysady hyzmatdaşlyk boýunça hökümetara türkmen-rus toparynyň bilelikdäki başlyklary – Türkmenistanyň Ministrler Kabinetiniň Başlygynyň orunbasary Nökerguly Atagulyýew bilen Russiýa Federasiýasynyň Hökümetiniň Başlygynyň orunbasary Marat Husnulliniň duşuşygy geçirildi.

“Rus-türkmen gatnaşyklary ynanyşmak we hyzmatdaşlyk ruhunynda ösdürilýär. Golaýda geçirilen KazanForum-a türkmen tarapynyň aýratyn ähmiýet berendigi we oňa türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň gatnaşandygy üçin minnetdarlygymy bildirmek isleýärin. Şu günki duşuşygymyzyň özara gatnaşyklaryň mundan beýläk-de ösdürilmegine itergi berjekdigine ynanýaryn. Gazanylan ähli ylalaşyklary ýerine ýetirmek ugrunda, halklarymyzyň bähbidine bilelikde işleri alyp bararys” – diýip, Marat Husnullin aýtdy.

Russiýa bilen Türkmenistanyň arasyndaky söwda-ykdysady gatnaşyklaryň ýokary depgin bilen ösýändigini belläp geçdi. 2025-nji ýylyň ýanwar – mart aýlarynda söwda dolanyşygy 21,4% artdy. Özara söwdany ösdürmek maksady bilen, taraplar häzirki wagtda hökümetara çäreleriň 2025-2027-nji ýyllar üçin meýilnamasyny taýýarlamak ugrunda işleri alyp barýarlar diýip, wise-premýer özüniň üstüni ýetirdi. Bu barada RF-iň Hökümetiniň metbugat gullugy habar berýär.

Duşuşygyň dowamynda taraplar söwda, senagat, energetika, oba hojalygy, medeniýet, bilim ulgamlaryndaky hyzmatdaşlygyň ugurlaryny jikme-jik ara alyp maslahatlaşdylar hem-de ikitaraplaýyn gatnaşyklary mundan beýläk-de ösdürmegiň meýilnamalaryny kesgitlediler.

Halkara ulag geçelgelerin işjeň ösdürilmegiň çäklerinde, täze ugurlara, şol sanda Türkmenistandan Hytaýa we beýleki ýurtlara barýan ugruň mümkinçiliklerine garaldy. Geljegi uly taslamalaryň hatarynda Türkmenbaşy portuna çykalgasy bolan Wolga-Hazar kanaly, şeýle hem “Demirgazyk – Günorta” halkara ulag geçelgesiniň çägindäki “Hazaryň Gündogar kenary boýunça geçelgesi” ugry görkezilýär.

Medeni ugurdaky hyzmatdaşlyk rus-türkmen gatnaşyklarynyň möhüm ugurlarynyň biri hökmünde kesgitlenýär. Medeni çäreleri özara geçirmek däbiniň täzeden ýola goýulmagy aýratyn ähmiýetli waka boldy. Geçen ýyl Türkmenistanda Russiýanyň medeniýet günleri geçirildi.

Türkmenistanyň Ministrler Kabinetiniň Başlygynyň orunbasary Nökerguly Atagulyýew duşuşykda gozgalan meseleleri konstruktiw ýagdaýda ara alyp maslahatlaşmaga taýýardygyny beýan edip, bu duşuşygyň özara bähbitli gatnaşyklaryň mundan beýläk-de ösdürilmeginde esas bolup hyzmat etjekdigine ynam bildirdi.

ORIENT