Biz ýakynlaşmagy ugur edinýäris

Lybastar, şaý-sepler we bezeg esbaplary – elmydama aýallary gyzyklandyrýan temalaryň biridir. Bu tema baýramçylyk günlerinde has-da möhüm ähmiýete eýe bolýar, aýratyn-da dürli halklaryň milli lybaslary barada gürrüň edilende. Olar taryhy we medeni däp-dessurlaryň özboluşlylygyny görkezýär.

Şu tema bilen baglanyşykly döredijilik duşuşygy Türkmenistanyň ussat zenanlarynyň hem-de Hytaý Halk respublikasynyň ilçihanasynyň wekilleriniň gatnaşmagynda ART-bazar meýdançasynda geçirildi. Bu ýerde Türkmenistanyň sungat, medeniýet we senetçilik däpleriniň giň görnüşi görkezilen.

Duşuşyga gatnaşyjylary ÝUNESKO-nyň howandarlygyndaky «Dizaýn plus» döredijilik jemgyýetiniň ýolbaşçysy Täjigül Gurbanowa garş alyp, Türkmenistanyň Gahrymany, ÝUNESKO bilen işler boýunça Milli toparyň jogapkär kätibi Çynar Rüstemowanyň gutlaglaryny ýetirdi. Hytaý tarapyndan çykyş eden Hytaýyň ilçihanasynyň maslahatçysy-wekili Çžun Hua bolsa, Halkara zenanlar güni bilen gutlap, Türkmenistanda gender syýasatynda, maşgalanyň gymmatlyklaryny we medeni däp-dessurlary gorap saklamakda uly üstünlikleriň gazanylandygyny belledi.

Duşuşygyň dowamynda ýaş türkmen dizaýnerleri häzirki zaman lybaslarynda milli keşdeleriň we dizaýn elementleriniň özboluşly ulanylyşyny görkezýän moda kolleksiýalaryny hödürlediler. Türkmenleriň milli lybaslaryny döretmegiň däpleri we lybaslaryň geýmek düzgünleri barada etnograf Ajap Baýryýewa gürrüň berdi. Hytaýly myhmanlaryň aýratyn ünsüni dizaýn taýdan köpdürli we dürli maksatly türkmen milli kümüş şaý-sepleri özüne çekdi. Olar zergär Leýla Seýidowa tarapyndan görkezildi. Öz gezeginde, hytaýly wekiller «Hytaýyň milli lybas medeniýeti» atly tanyşdyryş çäresini geçirip, türkmen gatnaşyjylaryny Hytaýyň gadymy we baý lybas däpleri bilen tanyşdyrdylar.

Duşuşygyň gyzgalaňly we täsirli ruhy diňe bir özara täsirli döredijilik söhbetdeşligi bilen çäklenmän, eýsem, milli lybaslary geýip görmek mümkinçilikleriniň bolmagy bilen hem üpjün edildi.

ORIENT

Foto: Täjigul Kurbanowa