Şu gün Döwletmämmet Azady adyndaky Türkmen milli dünýä dilleri institutynda Türkmenistanyň we daşary ýurtlaryň ýokary okuw mekdepleriniň talyplarynyň arasynda iňlis dili dersi boýunça geçirilýän V halkara internet olimpiadasynyň dabaraly açylyşy boldy. Bu abraýly bäsleşik dünýäniň 32 döwletinden hasaba alnan ýaşlaryň arasyndan saýlanan, 15 ýurduň 48 sany öňdebaryjy ýokary okuw mekdebiniň ýüzlerçe zehinli talyplaryny bir sanly meýdançada birleşdirdi.

Dabaraly çäre institutyň uly mejlisler zalynda ýokary guramaçylyk derejesinde geçirilip, onda häzirki zaman sanly tehnologiýalaryň mümkinçiliklerinden giňden peýdalanyldy. Ýurdumyzyň ýokary okuw mekdepleriniň wekilleri bilen bir hatarda, Beýik Britaniýanyň, Russiýa Federasiýasynyň we Indoneziýanyň meşhur ylym-bilim ojaklarynyň professor-mugallymlary hem-de talyplary onlaýn arkaly dabara goşulyp, özara tejribe alyşdylar.

Dabara gatnaşan halkara bilermenleriň her biriniň çykyşy özboluşly ylmy we ruhy mazmuna baý boldy. Olaryň baý mazmunly çykyşlary talyplaryň ylma bolan höwesini has-da artdyryp, ýaşlary täze belentliklere ruhlandyrdy. Çykyşlarda nygtalyşy ýaly, bu olimpiada diňe bir talyplaryň dil bilimlerini synlaman, eýsem, dünýäniň dürli ýurtlarynyň ýokary okuw mekdepleriniň arasynda ylym-bilim gatnaşyklarynyň täze köprülerini gurmaga ýol açýar. Iki günüň dowamynda, ýagny 10-11-nji aprel aralygynda talyplar iňlis diliniň nazaryýeti we amaly ulanylyşy boýunça özara bäsleşip, özleriniň intellektual ukyplaryny görkezerler.

Institutyň «Altyn miras» medeniýet merkeziniň ýaş zehinleriniň ýerine ýetiren «Watan» aýdymynyň belent owazy bolsa dabaranyň şowhunyny has-da artdyryp, kalplarda beýik maksatlara bolan hyjuwy oýardy.

ORIENT