Duşenbe güni Prezident Serdar Berdimuhamedow oba hojalyk toplumynda alnyp barylýan işlere bagyşlanan iş maslahatyny geçirdi. Oba hojalyk toplumynda alnyp barylýan işlere bagyşlanan maslahata wise-premýer Taňryguly Atahallyýew we welaýatlaryň häkimleriniň gatnaşdy.

Maslahatyň dowamynda döwlet Baştutanyna Balkan welaýatynyň häkimi Hojamyrat Aşyrmyradow welaýatyň pagta tabşyrmak baradaky şertnamalaýyn borçnamalaryny üstünlikli ýerine ýetirendikleri barada hasabat berdi.

Ahal welaýtynyň (S.Soltanmyradow), Daşoguz welaýatynyň (D.Babaýew), Lebap welaýatynyň (M.Annanepesow) we Mary welaýatynyň (B.Orazow) häkimleri ýolbaşçylyk edýän welaýatlarynda möwsümleýin oba hojalyk işleriniň barşy barada hasaba berdiler.

Habar berlişi ýaly, pagta hasylyny ýygnamak möwsüminde ulanylýan oba hojalyk tehnikalarynyň netijeli işledilmegini gazanmak, ýygnalan hasyly kabul ediş harmanhanalarynda bökdençsiz kabul etmek boýunça degişli işler alnyp barylýar. Bugdaý ekişi geçirilen meýdanlarda ideg işleri ýerine ýetirilýär. Sebitde geljek ýylyň hasyly üçin gowaça ekiljek meýdanlarda sürüm işlerine girişildi. Welaýatlaryň häkimleri medeni-durmuş, önümçilik maksatly desgalardaky gurluşyk işleri barada hasabat berdiler.

Häkimleriň çykyşynyň ahyrynda Ministrler Kabinetiniň Başlygynyň orunbasary Taňryguly Atahallyýew döwlet Baştutanyna möwsümleýin oba hojalyk işleriniň barşy barada umumy hasabat berdi.

Çykyşlaryň netijeleri boýunça Türkmenistanyň Prezidenti welaýatlaryň häkimlerine pagta hasylyny ýygnap almak üçin geçirilýän işlere berk gözegçilik etmegiň, ýygym möwsüminde oba hojalyk tehnikalaryň, pagta arassalaýjy kärhanalaryň, kabul ediş harmanhanalarynyň doly güýjünde işledilmegini tabşyrdy.

Döwlet Baştutany, Balkan welaýatynyň pagta öndürijilerini pagta tabşyrmak baradaky şertnamalaýyn borçnamalaryny üstünlikli ýerine ýetirilmegi bilen gutlady we olara täze üstünlikler arzuw etdi.

Aýratynlykda Daşoguz we Lebap welaýatlarynyň häkimlerine şalyny ýygnamak, Mary welaýatynyň häkimine bolsa gant şugundyrynyň hasylyny ýitgisiz ýygnap almak üçin tabşyryklar berildi.

Maslahata gatnaşyjylaryň ählisine bugdaý ekilen meýdanlardaky ideg işleriniň geçirilişine berk gözegçilik etmegi, haşal otlara garşy işleriň öz wagtynda, talabalaýyk alnyp barylmagyny, bugdaý meýdanlarynda ösüş suwuny tutmak, mineral dökünler bilen iýmitlendirmek işlerine aýratyn üns bermegi tabşyrdy.

Geljek ýylyň hasyly üçin gowaça ekiljek ýerlerde sürüm işlerini wagtynda geçirmek, şeýle hem önüm öndürijiler bilen hyzmat ediji edara-kärhanalaryň arasynda hasaplaşyklaryň öz wagtynda geçirilmegini üpjün etmek tabşyryldy.

Prezident şu ýyl açylyp ulanmaga berilmegi meýilleşdirilen medeni-durmuş, önümçilik maksatly desgalarda gurluşyk işleriniň barşyna gözegçilik etmek tabşyryldy. Iş maslahatyna gatnaşyjylara başga-da birnäçe guramaçylyk meseleleri boýunça görkezmeler berildi.

ORIENT