Computex 2026 halkara sergisinde MSI kompaniýasy güýçli täze kompýuterleri sungat eserlerine öwrüp, tomaşaçylary haýran galdyrdy. Brend Disney multfilmlerinden, suratkeş Winset Wan Gogyň meşhur eserlerinden hem-de kompaniýanyň öz fentezi gahrymanlaryndan ylham alnan sany çäkli noutbuk seriýalaryny hödürledi.

Animasiýa muşdaklary üçin kosmos reýnjeri Bazz Laýtere bagyşlanan MSI Cyborg 15 C13W Toy Story Special Edition modeli taýýarlandy. Onuň ak korpusy açyk ýaşyl-gyrmyzy reňkler bilen bezelip, toplumyna tematik torba, syçanjyk, halyça we stikerler girýär. 15,6 dýuýmlyk ekranly bu noutbuk Intel Core i5 prosessorynda işleýär we Nvidia GeForce RTX 5050 wideo karty bilen enjamlaşdyrylandyr. Sany çäkli öndürilen bu täze model 2026-njy ýylyň iýul aýynda satuwa çykarylar.

Nusgawy sungatyň muşdaklary üçin Artisan kolleksiýasyna degişli nepis Prestige 14 Flip AI+ Vincent van Gogh Edition transformeri hödürlenýär. Onuň korpusy «Ýyldyzly gije» we «Ronanyň üstündäki ýyldyzly gije» suratlarynyň reproduksiýalary bilen bezelen. Agramy bary-ýogy 1,37 kilogram bolan enjam sensorly OLED ekran we güýçli Intel Core Ultra X9 çibi bilen üpjün edilip, dizaýnerler we estetika muşdaklary üçin amatly ykjam iş guralyna öwrülýär.

Kompaniýa talapkär geýmerleri hem ünsden düşürmedi. Öz döredilmeginiň 40 ýyllygy mynasybetli MSI iň ýokary derejeli Titan 18 HX Draco Epic modelini döretdi. Bu noutbuk Intel Core Ultra 9 prosessory, RTX 5090 wideo karty we uly 18 dýuýmlyk mini-LED ekrany bilen enjamlaşdyrylandyr. Şeýle hem, Crosshair 16 HX Dragon Princess modeli merjen öwüşginli korpusy, gyzyl bezegleri we täze nesil grafiki mümkinçilikleri bilen ünsi özüne çekýär. MSI bu täzelikleri bilen ýokary öndürijilikli tehnologiýalaryň diňe bir iş guraly däl, eýsem özüňi beýan etmegiň täsirli usuly hem bolup biljekdigini görkezdi.

ORIENT