Türkmenistanyň Bilim ministrliginde Aziýa Ösüş Bankynyň (AÖB) wekiliýeti bilen iş duşuşygy geçirildi. Gepleşikleriň esasy mowzugy CAREC sebit maksatnamasynyň çäklerinde ýurdumyzyň ýokary we hünär-tehniki bilim ulgamyna ekologik “ýaşyl” başarnyklary ornaşdyrmak, şeýle hem okuw işini sanlylaşdyrmak boldy. Bu barada Türkmenistanyň Bilim ministrliginiň resmi saýtynda habar berilýär.

Täze ekostandartlar we hünärmenleri taýýarlamak

Duşuşyga gatnaşyjylar Türkmenistanyň ýokary okuw mekdepleriniň we orta hünär okuw mekdepleriniň okuw meýilnamalaryna ekologiýa ýörelgelerini girizmek meselelerini ara alyp maslahatlaşdylar. Bu işler ýurdumyzyň Pariž ylalaşygy boýunça öz üstüne alan borçnamalaryny ýerine ýetirmegi bilen gönüden-göni baglydyr.

Bilelikdäki taslamalaryň esasy ugurlary “ýaşyl” ykdysadyýetde isleg bildirilýän hünärleri Senagatçylar we telekeçiler birleşmesiniň gatnaşmagynda kesgitlemegi, şeýle hem degişli okuw mekdepleriniň mugallymlaryny halkara derejede attestasiýadan geçirmegi öz içine alýar. Daşary ýurtly hyzmatdaşlar bilen bilelikde oba hojalyk ekotehnologiýalary boýunça täze okuw kurslary taýýarlaýan S.A.Nyýazow adyndaky Türkmen oba hojalyk uniwersitetiniň üstünlikli tejribesine aýratyn üns berildi.

Sanlylaşdyrma we täze mümkinçilikler

Duşuşygyň dowamynda bilim ministriniň orunbasary Azat Ataýew bu başlangyçlaryň Türkmenistanyň Prezidentiniň Merkezi Aziýada howa tehnologiýalary boýunça sebit merkezini döretmek strategiýasyny goldaýandygyny aýtdy. Şeýle hem ol myhmanlaraly türkmen bilim edaralarynda üstünlikli ornaşdyrylýan häzirki zaman sanly platformalary bilen tanyşdyrdy.

AÖB-niň wekilleri Türkmenistanyň sanlylaşdyrmak babatdaky üstünliklerine ýokary baha berdiler hem-de hyzmatdaşlygy giňeltmegi teklip etdiler. Geljek meýilnamalarda syýahatçylyk, bilim ykdysadyýeti we ýokary tehnologiýaly önümçilik ugurlary üçin hünärmenleri bilelikde taýýarlamak göz öňünde tutulýar. Duşuşygyň netijesinde taraplar täze amaly taslamalary işe girizmäge taýýardyklaryny tassykladylar.

ORIENT