9-njy maýda halkara jemgyýetçiligi parahatçylyga, jebislige we integrasiýa bagyşlanan baýramçylygy — Ýewropa gününi belleýär. Bu sene ýurtlaryň durnukly geljek we ösüş ugrunda birleşmegine gönükdirilen taryhy ädimi alamatlandyrýar.

Döreýiş taryhy

Bu baýram “Şuman jarnamasynyň” hormatyna bellenilýär. 1950-nji ýylyň 9-njy maýynda Fransiýanyň daşary işler ministri Robert Şuman Ýewropada syýasy we ykdysady hyzmatdaşlygyň täze görnüşini teklip etdi. Bu başlangyç halklaryň arasynda uruşlaryň mümkin bolmazlygyny üpjün etmäge gönükdirilipdi. Hut şol resminama häzirki zaman Ýewropa Bileleşiginiň döredilmegine esas boldy.

Baýramçylygyň häzirki döwürdäki ähmiýeti

Häzirki wagtda Ýewropa güni diplomatik gepleşikleriň we köptaraplaýyn hyzmatdaşlygyň möhümdigini nygtamak üçin mümkinçilik bolup hyzmat edýär. Dünýäniň dürli ýurtlarynda bu sene mynasybetli medeni, bilim we jemgyýetçilik çäreleri geçirilýär.

Durnukly ösüş, “ýaşyl” tehnologiýalar we ýaşlaryň başlangyçlaryny goldamak bilen bagly taslamalara aýratyn üns berilýär. Bu baýramçylyk açyklygyň we bilelikdäki tagallalaryň üsti bilen häzirki döwrüň ählumumy meselelerini netijeli çözmegiň mümkindigini ýatladýar.

ORIENT