9-njy maý, ORIENT. Prezident Serdar Berdimuhamedowyň anna güni «Awaza» milli syýahatçylyk zolagynda geçiren Ministrler Kabinetiniň göçme mejlisinde Balkan welaýatynyň depginli ösüşiniň hemmetaraplaýyn seljermesi hödürlendi. Ýurduň ägirt uly senagat we logistika mümkinçiliklerine eýe bolan günbatar sebiti 2026-njy ýylyň ýanwar-aprel aýlarynda täsirli netijeleri görkezdi.

Sebitiň mümkinçilikleriniň dünýä derejesine çykandygyny tassyklaýan esasy waka — “Balkan” gämi gurluşyk we abatlaýyş zawodynda ilkinji ýerli “Gadamly” atly gury ýük gämisiniň gurlup, ulanmaga berilmegi boldy. Gämigurluşyk pudagynyň ösmegi bilen bir hatarda, Türkmenbaşy etrabynda ýyllyk kuwwaty 1 million 155 müň tonna bolan täze karbamid öndürýän toplumyň gurluşygyna başlandy. Bu taslama sebitiň himiýa senagatynyň eksport mümkinçiliklerini has-da artdyrmaga gönükdirilendir.

Ykdysady ösüş sanlar bilen hem tassyklanýar: Balkan welaýaty boýunça senagat önümçiliginiň möçberi geçen ýylyň degişli döwri bilen deňeşdirilende, dört aýyň dowamynda 6,6% ýokarlandy. Strategik pudaklarda hem ösüş hasaba alyndy: nebit çykarylyşy 1,9%, nebiti gaýtadan işlemek 4,4%, elektrik energiýasynyň öndürilişi 4% we ýoduň öndürilişi 6,5% artdy.

Mineral dökünleriň önümçiligi hakyky ösüşi başdan geçirýär, onuň möçberi 2,1 esse artdy. Sarp ediş harytlarynyň, şol sanda nah ýüplükleriň (+11%) we azyk önümleriniň öndürilişi hem işjeň ýokarlanýar. Unuň öndürilişi 52,5%, gök önümleriň öndürilişi 1,5 esse, tutulan balyklaryň möçberi 14,1% artdy. Bölek satuw haryt dolanşygynda (+6,3%) hem-de ulagyň ähli görnüşleri arkaly ýük we ýolagçy daşamak ulgamynda oňyn oňyn bellenildi.

Häzirki wagtda welaýatyň çäginde 260-dan gowrak iri desganyň gurluşygy alnyp barylýar. Senagat ägirtleri bilen bir hatarda, ulag düzümi hem işjeň döwrebaplaşdyrylýar: Türkmenbaşy — Garabogaz — Gazagystan serhedi awtomobil ýolunyň gurluşygy dowam edýär, ýollar we köprüler döwrebap ýagdaýa getirilýär.

Uly möçberli maýa goýumlary durmuş ulgamyna we saglygy goraýyş pudagyna gönükdirildi: şu ýyl iki sany çagalar bagyny, iki sany umumybilim berýän mekdebi, Saglyk öýüni we döwrebaplaşdyrylan Enäniň we çaganyň saglygyny goraýyş merkezini ulanmaga bermek meýilleşdirilýär. “Mollagara” we “Awaza” şypahanalarynda ýokary hilli şypahana hyzmatlary hödürlenilýär.

Welaýatda 22-27-nji iýun aralygynda geçiriljek Medeniýet hepdeligine işjeň taýýarlyk görülýär. Oba hojalyk pudagynda häkimlik gowaçanyň ösüş suwuny, bugdaý ekilen meýdanlarda ideg edilmegini we galla oragy möwsümine taýýarlyk görmegi, şeýle hem ýüpek gurçugynyň pilasyny taýýarlamagy we gök-bakja ekinlerine ideg edilmegini üpjün edýär. Mejlisiň jemleri boýunça Prezident Serdar Berdimuhamedow sebitiň durmuş-ykdysady taýdan mundan beýläk-de ösdürilmegi we ilatyň ýaşaýyş şertleriniň gowulandyrylmagy ugrunda alnyp barylýan işleri dowam etdirmegiň möhümdigini nygtady.

Döwlet Baştutany maýa goýumlaryň wagtynda özleşdirilmegini yzygiderli gözegçilikde saklamagy tabşyrdy. Balkan welaýatynyň logistika mümkinçiliklerini doly güýjünde peýdalanmagyň, Türkmenbaşy we Balkanabat halkara howa menzilleriniň işini yzygiderli kämilleşdirmegiň, şeýle hem Türkmenbaşy halkara deňiz portunyň işini talabalaýyk guramagyň zerurdygyna aýratyn üns çekildi.

Serdar Berdimuhamedow, şeýle hem ulag we aragatnaşyk boýunça wise-premýere “Balkan” gämi gurluşyk we abatlaýyş zawodynda gämigurluşyk taslamalaryny yzygiderli durmuşa geçirmegi we Türkmenistanyň deňiz döwleti hökmündäki derejesini berkitmegi tabşyrdy.