1-nji maýda, anna güni geçirilen Ministrler Kabinetiniň mejlisiniň dowamynda wise-premýer Taňryguly Atahallyýew türkmen atşynaslarynyň abraýly halkara çärelerine gatnaşmaga görýän taýýarlygy barada hasabat berdi. Özbegistanyň paýtagtynda geçiriljek «Gündogaryň merjeni 2026» atly dünýä çempionaty maý aýynyň esasy wakalarynyň birine öwrüler.

Döwlet Baştutany “Garaşsyz, baky Bitarap Türkmenistan — bedew batly at-myradyň mekany” ýyly bilen baglylykda, daşary ýurtlarda hem birnäçe halkara çäreleriň geçirilýändigini, hususan-da, Daşkent şäherinde «Gündogaryň merjeni» atly halkara çäräniň geçirilmeginiň behişdi bedewlerimiziň şan-şöhratyny has-da artdyrmaga ýardam berjekdigini aýtdy.

Daşkentdäki çäreleriň maksatnamasy (9–10-njy maý) şulary öz içine alýar:At çapyşyklary: 1000 metrden 2400 metre çenli aralyklarda geçiriljek bäsleşikler bolup, onda tohumyň iň oňat wekilleriniň ýüwrükligi synalar;Gözellik we eksterýer bäsleşigi: ahalteke bedewleriniň nusgawy gözelligini dünýä görkezmäge gönükdirilen «Gündogaryň merjeni» atly sergi-görkezilişi; şeýle hem sebitdäki medeni gatnaşyklary berkitmäge gönükdirilen «Ahalteke bedewi — halklaryň dostlugynyň nyşany» atly maslahaty.

Döwlet Baştutany wise-premýere öňde boljak sport we gözellik bäsleşiklerine ýurdumyzyň atşynaslarynyň we bedewleriniň ýokary guramaçylyk derejesinde gatnaşmagyny üpjün etmegi tabşyrdy. Türkmenistan üçin bu çempionat diňe bir ýaryş däl-de, eýsem türkmen halkynyň dünýä medeniýetine goşan bahasyna ýetip boljak goşandy bolan behişdi bedewleriň watany hökmündäki derejesini ýene bir gezek tassyklamaga mümkinçilikdir.