Hytaýyň täjirçilik maksatly uçarmansyz ýük uçary HH-200 15-nji aprelde Şensi welaýatynyň Puçen şäherinde ilkinji üstünlikli uçuşyny amala aşyrdy. Bu enjam AVIC XAC Commercial Aircraft kompaniýasy tarapyndan işlenip taýýarlanyldy we taslama takmynan bäş ýyl dowam etdi — Xinzhou Honghu HH seriýasynyň taslamasy 2021-nji ýylyň sentýabr aýynda başlandy.

HH-200 doly awtonom uçuş ulgamy bilen enjamlaşdyrylyp, emeli aň arkaly päsgelçilikleri aýlanyp geçip bilýär. Ýük bölüminiň adaty göwrümi 12 kub metr bolup, ol 18 kub metre çenli giňeldilip bilner. Iň ýokary peýdaly ýük göterijiligi — 1,5 tonna, kreýser tizligi — 310 km/sag, uçuş aralygy bolsa 2360 km. Enjamyň hyzmat möhleti 50 000 uçuş sagady ýa-da 15 000 uçuş-gonuş tapgyry. Tutuş hyzmat möhletindäki doly peýdalanmak bahasy her tonna-kilometr üçin 4,7 ýuan (takmynan 0,69 ABŞ dollary) bolup durýar.

Baş konstruktor Dun Szýanhunyň aýtmagyna görä, HH-200-iň esasy wezipesi Hytaýyň uzak we az ösüş gazanan sebitlerinde logistika hyzmatlaryny üpjün etmekden ybaratdyr. “Adamlar nirede ýaşaýandygyna garamazdan deň derejede ýaşaýyş hilinden peýdalanmalydyr” diýip, ol belledi.

Uçarmansyz uçar daşky gurşawa ýokary uýgunlaşma ukybyna eýedir: ol 500 metrden başlap uçuş-gonuş zolagynda, şeýle hem 4200 metrden ýokary daglyk aerodromlarda uçup we gonup bilýär. Işleýän temperatura aralygy - 40-dan + 50 gradus Selsiýa çenli. Enjam güýçli şemalda, ýagyşda we garda hem işläp bilýär, daglyk ýerlerde, adalarda we beýik platolarda ulag päsgelçiliklerini ýeňip geçýär.

HH-200 öňünden kesgitlenen meýilnama boýunça awtonom uçuşy ýerine ýetirýär, emma zerur bolan ýagdaýynda uzakdan dolandyrmak we wezipesini wagtlaýyn üýtgetmek üçin dolandyryş merkezi bilen aragatnaşyk saklaýar.