Hytaýyň robototehnika pudagy çalt depginde ösýär: Anhoý welaýaty soňky on ýylda robot önümçiliginiň 30 esse artandygyny habar berdi. Bu ösüşiň öň hatarynda ýurduň ilkinji milli robototehnika klasterine eýe bolan Uhu şäheri ýerleşýär.

Uhudaky AiMOGA Robotics zawodynda dört aýakly robotlaryň täze nesli bazara çykmaga taýýarlanýar. 13 erkinlik derejesine eýe bolan robot-it 5 kg ýük göterip bilýär we bir gezeklik zarýad bilen iki sagada çenli işleýär. Ol gyrymsy ösümlikleriň arasynda, çagylly ýerlerde we eňňitlerde hereket edip, kyn ýetilýän ýerleri barlap bilýär. Gijeki görüş ulgamy bilen üpjün edilen bu robot daşary ýurtlarda senagat desgalaryna we ýaşaýyş jaýlaryna gözegçilik etmek üçin giňden ulanylýar. Onuň dizaýny ony maşgala kömekçisi hökmünde hem meşhur etdi.

AiMOGA adam şekilli robotlary hem eksport edýär (boýy takmynan 1,67 m), olar 11 dili goldaýar. “Biziň robotlarymyz 30-dan gowrak ýurda eksport edilýär. Ýewropada — Beýik Britaniýa, Polşa, Italiýa ýaly ýurtlara uly möçberde iberilýär. Bu bolsa önümlerimiziň ýokary derejesini görkezýär,” - diýip, AiMOGA zawodynyň daşary ýurt bazarlary boýunça menejeri Şen Sýantýan aýtdy.

Gümrük maglumatlary hem bu ösüşi tassyklaýar. Uhu gümrük gullugynyň işgäri Fan Ýu häzirki wagtda robotlar üçin 13 nyrhnama kategoriýasynyň bardygyny, on ýyl öň olaryň diňe bäş bolandygyny aýtdy. “2023-nji ýylda ‘kollaboratiw robotlar’ kategoriýasy goşuldy, 2026-njy ýylda bolsa ‘akylly bioniki robotlar’ we ‘arassalaýjy robotlar’ kategoriýalary girizildi. Bu bolsa hytaý robotlarynyň ulanylyş mümkinçilikleriniň giňeýändigini görkezýär,” - diýip, Fan belledi.

Analitikleriň pikiriçe, hytaý öndürijileri takyk dizaýn, ýöriteleşdirilen programmalary we emeli aňy integrirlemek arkaly bäsdeşlige ukyplylygyny güýçlendirýär.