||
Hytaýyň Täze ýylyHytaýyň günortasyndaky Haýnan welaýatynyň Haýkou şäherinde altynjy Hytaý halkara sarp ediş harytlary sergisi (CICPE) geçirilýär. Sergide akylly robotlardan başlap, pes belentlikde uçuşlar üçin niýetlenen uçýan enjamlara çenli 200-den gowrak täze önüm görkezilýär. Bu bolsa myhmanlara hytaý innowasiýalarynyň geljegine nazar aýlamaga mümkinçilik berýär.
Bu ýyl 13–18-nji aprel aralygynda geçirilýän Hytaý halkara sarp ediş harytlary sergisi Haýnan erkin söwda portunda tutuş ada boýunça ýörite gümrük amallarynyň işe girizilmeginden soň geçirilýän ilkinji milli sarp ediş harytlary sergisidir.
Ýokary tehnologiýalar zolagynda esasy üns robot-itlere we adam şekilli robotlara gönükdirilýär.
«Bu hakykatdanam ajaýyp! Şeýle zady memem alyp bilerinmi?» - diýip, ýaş myhmanlaryň biri sorady.
«Biz bu robotlara, adam şekilli robotlara haýran galdyk. Hatda olar bilen bile tans etdik», - diýip, başga bir myhman aýtdy.
Geljekki görnüşli, sekiz rotory korpusynyň içinde gizlenen uçýan awtoulag dört ýolagçyny daşap bilýär we halas ediş işleri, syýahatçylyk hem-de pes belentlikde uçuşlar üçin niýetlenendir. Bu enjam Kanadadan gelen alyjynyň ünsüni çekdi.
«Maňa hytaý önümleri örän ýaraýar. Olar ýokary hilli. Şeýle hem biz olary Yrak bazaryna eksport etmegi meýilleşdirýäris», - diýip, alyjy aýtdy.
Guançžoudan bolan sport harytlaryny öndüriji kompaniýa, bu sergä üçünji gezek gatnaşyp, täze daşary ýurt bazarlaryny açmagy başardy. Bu ýyl olar iň täze ýokary tehnologiýaly materiallardan taýýarlanan piklbol üçin professional enjamlary hödürleýärler.
«Soňky iki serginiň netijesinde biz eýýäm Indoneziýa we Malaýziýa bazarlaryna çykdyk, şeýle hem Ýakyn Gündogarda müşderiler tapdyk. Bu ýyl bolsa önümlerimizi Singapurda hödürlemegi meýilleşdirýäris», - diýip kompaniýanyň wekili Çžan Şen aýtdy.
Esasy meýdançadan başga-da, sergide Boao Leçen halkara lukmançylyk syýahatçylygy synag zolagynda halkara saglygy goraýyş zolagy hem görkezilýär. Bu ýerde sekiz sany täze lukmançylyk enjamy dünýäde ýa-da Hytaýda ilkinji gezek tanyşdyryldy.
Hytaý halkara sarp ediş harytlary sergisi Hytaýda geçirilýän ýeke-täk milli derejeli sarp ediş harytlary sergisi bolup, Aziýa-Ýuwaş umman sebitindäki iň uly sarp ediş sergisidir. 2021-nji ýylda döredileli bäri bu çäre halkara kompaniýalar üçin möhüm meýdança bolup hyzmat edýär we olara Hytaýyň uly bazaryndaky sarp ediş tendensiýalary bilen tanyşmaga mümkinçilik berýär. Soňky bäş ýylyň dowamynda sergä 92 ýurtdan we sebitden 3800-den gowrak kompaniýa hem-de 12 000-den gowrak brend gatnaşdy.