Ýanwar aýynda Hytaý dünýä maýadarlary üçin ýokary özüne çekijiligini saklady. Söwda ministrliginiň maglumatlaryna görä, daşary ýurt maýa goýumlary bilen döredilen täze kärhanalaryň sany ep-esli artdy, ýokary tehnologiýa pudaklary bolsa uly möçberde maýa çekmegini dowam etdirdi.

Bir aýyň dowamynda ýurt boýunça daşary ýurt maýa goýumlary bilen 5 müň 306 täze kärhana döredildi. Bu görkeziji geçen ýylyň degişli döwri bilen deňeşdirilende 25,5 göterim ýokarydyr. Daşary ýurt maýasynyň hakykatda özleşdirilen möçberi 92 milliard ýuana (takmynan 13,4 milliard ABŞ dollary) deň boldy. Bu görkeziji Hytaýyň işewürlik gurşawyna halkara ynamyň saklanýandygyny tassyklaýar.

Ösüşiň esasy hereketlendirijisi ýokary tehnologiýa pudaklary boldy. Bu ugurda daşary ýurt maýasynyň hakykatda özleşdirilen möçberi 33,7 milliard ýuandan (takmynan 4,9 milliard ABŞ dollaryndan) gowrak boldy. Geçen ýyl bilen deňeşdirilende görkeziji 0,6 göterim ýokarlandy, onuň umumy milli möçberdäki paýy bolsa 36,7 göterime ýetdi. Bu bolsa geçen ýylyň degişli döwri bilen deňeşdirilende 2,3 göterim görkeziji ýokarydyr.

Mundan başga-da, birnäçe iri ykdysadyýetlerden maýa goýumlarynyň akymy ep-esli çaltlandy. Hususan-da, Germaniýanyň kompaniýalary Hytaýa goýan hakykatdaky maýa goýumlaryny ýyllyk hasapda 86,6 göterim artdyrdy. Şeýle hem Şweýsariýanyň maýadarlarynyň goýumlary 57,4 göterim, Singapuryň maýadarlarynyň goýumlary bolsa 10,9 göterim ýokarlandy.