2025-nji ýylda Minsk traktor zawody tarapyndan öndürilýän önümleriň Özbegistanyň bazaryna eksporty öňki döwür bilen deňeşdirilende 15% artdy. Geçen ýylyň dowamynda özbek hyzmatdaşlaryna 3 müňden gowrak tehnikanyň birligi iberildi. Bu barada BELTA habar berýär.

Sebitde adatça 80-den 200 at güýjüne çenli kuwwatly traktorlar uly islegden peýdalanýar. Şol sanda pagta meýdanlarynda işlemek üçin niýetlenen ýörite BELARUS 80Х modeli hem giňden ulanylýar. Senagat hyzmatdaşlygynyň möhüm tapgyry hökmünde özbek kompaniýasy KRANTAS GROUP bilen belarus transmissiýalaryny ibermek boýunça şertnamanyň üstünlikli amala aşyrylmagy görkezilýär.

Häzirki wagtda MТZ-niň Özbegistandaky haryt paýlaýyş ulgamy bäş diler merkezini öz içine alýar. Daşkent welaýatynyň Nurafşan şäherinde bilelikdäki ýygnama önümçiligi üstünlikli işleýär, bu bolsa ýerli bazary zerur tehnikalar bilen tiz üpjün etmäge mümkinçilik berýär.

Eksport mümkinçilikleriniň giňelmegi zawodyň möhüm senä taýýarlyk görýän döwrüne gabat gelýär — 2026-njy ýylda MТZ özüniň 80 ýyllygyny belläp geçer. Şu waka mynasybetli kärhananyň resmi tumary tanyşdyrylar. Şeýle hyzmatdaşlygyň ösüş depgini Belarus Respublikasynyň Özbegistanyň esasy tehnologik hyzmatdaşlarynyň biri hökmündäki ornuny tassyklaýar.

ORIENT