Aşgabat, 20-nji fewral | ORIENT. Türkmenistan Aşgabat—Daşoguz awtomobil ýolunyň gurluşygy barada halkara tenderi yglan edýär. Taslama diňe bir ýol örtüginiň döwrebaplaşdyrylmagy bilen çäklenmän, eýsem tutuş ýoluň ugrundaky köprileriň gurluşygyny hem öz içine alýar. Bu bolsa çöl üstünden geçýän ýoly ýokary tehnologiýaly ulag geçelgesine öwürer.

Ýurdumyzyň esasy logistiki damarlarynyň birini hil taýdan täzelemek baradaky meýilnamalar barada Ministrler Kabinetiniň mejlisinde wise-premýer Baýmyrat Annamämmedow hasabat berdi. Meselä dünýä ülňülerine laýyk gelýän çuňňur döwrebaplaşdyryş işleri nukdaýnazaryndan garalýar.

Aşgabat—Daşoguz awtomobil ýoly demirgazyk welaýaty paýtagtymyz bilen birikdirýän iň gysga ýoldur. Ýurdumyzyň ýük akymynyň çalt ösmegi we ulag-üstaşyr mümkinçilikleriniň artmagy şertlerinde onuň täzelenmegi döwlet ähmiýetli ileri tutulýan wezipä öwrülýär.

Ýoluň durkunyň täzelenmegi näme getirer: döwrebap örtük we täze inženerçilik desgalary (köpriler) ýolda geçirilýän wagty ep-esli gysgaldar; täze magistral halkara ugurlaryň esasy halkasyna öwrülip, goňşy döwletleriň arasynda üznüksiz ýük daşamagyny üpjün eder; hyzmat we infrastruktura halkara derejesindäki täze hil derejesine çykarylar.

Halkara tenderiň yglan edilmegi Türkmenistanyň açyklygyny we iň gowy dünýä tehnologiýalaryny çekmek baradaky uly niýetlerini açyp görkezýär. Bu öňdebaryjy gurluşyk kompaniýalaryna sebitiň özboluşly tebigy-howa şertlerinde öz çözgütlerini görkezmek üçin mümkinçilikdir.

Hormatly Prezidentimiz Serdar Berdimuhamedow teklibi makullap, ýoluň ýurdumyz üçin esasy ýollaryň biri hökmündäki ähmiýetini aýratyn belledi. Ýoluň durkunyň täzelenmegi Türkmenistanyň Ýewraziýa ýollarynyň çatrygyna öwürmek boýunça giň gerimli strategiýanyň logiki dowamyna öwrüler.