Intel korporasiýasy ýat öndürijiligi bazaryna giň möçberde gaýdyp gelýändigini yglan etdi. Bu maksat bilen kompaniýa SoftBank ýapon holdingi bilen güýçlerini birleşdirýär. Bu karar strategiki öwrülişik hökmünde bahalandyrylýar: birnäçe ýyl mundan öň Intel NAND-ýat bölümini satyp, Optane taslamasyny ýapmak bilen bu bazardan doly çekilipdi. Emma emeli aň tehnologiýalarynyň çalt ösmegi we komponentleriň ýetmezçiligi kompaniýany öz ileri tutmalaryny täzeden gözden geçirmäge mejbur etdi.
Intel bilen SoftBank-yň bileleşigi serişdeleriň sinergiýasyna esaslanýar: ýapon holdingi maliýe goýumlaryny üpjün eder, Intel bolsa öz önümçilik kuwwatlyklaryny hödürlär. Taraplar adaty çipler pudagynda bäsleşmek niýetleriniň ýokdugyny beýan etdiler. Hyzmatdaşlygyň esasy maksady — emeli aň akseleratorlary üçin täze nesil ýöriteleşdirilen ýat çözgüdini işläp düzmekdir.
Täze arhitektura häzirki zaman neýron torlarynyň işleýşini haýalladýan maglumat geçirilişindäki “darlyklary” aradan aýyrmagy maksat edinýär. Garaşylyşyna görä, Intel-iň önümleri häzirki wagtda bazarda agalyk edýän Samsung we SK hynix ýaly kompaniýalaryň gymmat bahaly çözgütlerine alternatiw görnüş bolup biler.
Dünýä ýarymgeçiriji senagaty üçin şeýle uly oýunçynyň peýda bolmagy bahalaryň peselmegine we ýetmezçiligiň azalmagyna itergi berýän möhüm duýduryşdyr. Intel üçin bolsa bu ädim — ýaşaýyş taýdan möhüm bolan diwersifikasiýa bolup durýar. Prosesorlar bazarynda AMD we ARM bilen güýçli bäsleşik şertlerinde, emeli aň üçin ýat bazaryna çykmak kompaniýa öz zawodlaryny doly ýüklemäge we girdejili boşlugy eýelemäge mümkinçilik berer.
Eger Intel öňki ýalňyşlyklaryndan gaça durup, HBM-ýat ýaly möhüm ähmiýete eýe boljak önümi bazara hödürläp bilse, bu bileleşik dünýä ýarymgeçiriji senagatyndaky güýçleriň ýerleşişini düýpgöter üýtgedip biler.
ORIENT
