Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Özbegistanyň paýtagty Daşkent şäherinde Aziýa Olimpiýa Geňeşiniň (AOG) 46-njy Baş Assambleýasy geçirildi. Onuň jemleri boýunça guramanyň täze prezidenti wezipesine Katar döwletinden şeýh Joaan bin Hamad Al Tani saýlandy. Şeýlelikde, ol 1913-nji ýylda Aziýada ilkinji köpugurly sport oýunlarynyň geçirilmeginden bäri AOG-nyň 22-nji prezidenti boldy.
Saýlawlar Aziýanyň 45 döwletiniň milli Olimpiýa komitetleriniň wekilleriniň gatnaşmagynda geçirilen AOG-nyň Baş Assambleýasynyň çäklerinde geçirildi. Mejlise Özbegistan Respublikasynyň Prezidenti Şawkat Mirziýoýew hem gatnaşdy.
Milli Olimpiýa komitetleriniň assosiasiýasynyň (ANOC) uly wise-prezidenti hem-de Katar Olimpiýa komitetiniň prezidenti wezipesini eýeleýän şeýh Joaan bin Hamad Al Tani guramany ösdürmek boýunça öz konsepsiýasyny «Together for Asia» («Aziýa üçin bilelikde») şygary astynda hödürledi. Ol ileri tutulýan ugurlar hökmünde Aziýada sportuň ösüşini we agzybirligini berkitmegi, sport üstünliklerini goldamagy, dolandyryşda adalatlylyk ýörelgelerini ilerletmegi, innowasiýalary jogapkärçilikli ornaşdyrmagy, şeýle hem AOG-nyň çäreleriniň we maksatnamalarynyň durnuklylygyny, inklýuziwligini we aç-açanlygyny üpjün etmegi belledi. Şeýle-de Aziýanyň halkara derejesindäki wekiliýetini giňeltmäge, sebitiň bähbitlerini öňe sürmäge, sportuň parahatçylygyň, özara hormatyň we medeni dialogyň umumy dili hökmünde ornuna aýratyn üns beriljekdigi nygtaldy.
Wekilleriň öňünde çykyş edip, täze prezident Aziýanyň köpdürlüliginiň onuň esasy artykmaçlygy bolup durýandygyny we agzybirlik şertinde onuň Olimpiýa hereketini ösdürmekde hem-de ýaşlary dünýä sport giňişliginde goldamakda täze mümkinçilikleriň çeşmesine öwrülip biljekdigini aýtdy.
