Günorta Koreýanyň Hanbat we Kondju uniwersitetleriniň alymlary «akylly» jaýlaryň gurluşygynda uly özgerişlik döredip biljek innowasion materialy — açyk agaçy hödürlediler. Täze işläp taýýarlama ýörite suwuk kristallar bilen siňdirilen ýeňil balsa agajynyň esasynda döredildi. Alnan material aýnanyň ýagtylygy geçirme ukybyny tebigy agajyň ýokary berkligi bilen utgaşdyrýar.

Bu işläp taýýarlamanyň esasy artykmaçlygy daşky gurşawyň temperaturasyna baglylykda elektrik energiýasyny ulanmazdan, öz-özünden açyklygyny üýtgetmek ukybydyr. Material 40 °C-e çenli gyzanda 78% derejede açyk bolýar we ýagtylygyň iň ýokary möçberini geçirýär.

Salkyn howada bolsa bu görkeziji 28%-e çenli peselýär, bu bolsa agşam sagatlarynda goşmaça rahatlyk we hususylyk duýgysyny döredýär. Mundan başga-da, agaç zyýanly ultramelewşe şöhlelenmäni 100% derejede saklaýar, adamlaryň saglygyny we içerki interýeri reňkiniň solmagyndan goraýar.

Täze materialyň energiýa netijeliligi adaty aýnadan bäş esse ýokarydyr. Pes ýylylyk geçirijiligi gyşda ýylylygy saklamaga, tomusda bolsa jaýyň içindäki salkynlygy saklamaga mümkinçilik berýär. Bu bolsa jaý eýelerine ýyladyş we kondisioner üçin çykdajylary ep-esli azaltmaga kömek eder.

Işläp taýýarlamanyň ulanylyş gerimi diňe penjireler bilen çäklenmeýär. Alymlar açyk agaçy ýyladyşhanalarda mikroklimaty saklamak, şeýle hem lukmançylyk ulgamynda ulanmagy meýilleşdirýärler. Mysal üçin, onuň esasynda beden temperaturasynyň ýokarlanmagy bilen açyklygyny üýtgedýän we çişmäniň bardygyny görkezýän «akylly» plastyrlar döredilip bilner.

Bu tehnologiýa ýaşaýyş jaýlaryny has ekologiýa taýdan arassa we funksional edip, howpsuzlyk hem-de serişdeleri tygşytlamak meselelerini çözmäge ýardam berýär.

ORIENT