2026-njy ýylyň 1-nji ýanwaryndan başlap Belarusda maşgala maýasynyň täze möçberi bellenildi. Indi üçünji we ondan soňky çaganyň dünýä inmegi ýa-da ogullyga alynmagy bilen maşgalalar 35 505 belarus rubly möçberinde töleg alarlar. Bu barada BELTA habar berýär.

Geçen ýyl bilen deňeşdirilende, tölegiň möçberi 6,7% ýokarlandy. Bu bolsa döwlet goldawynyň 2 230 rubla artandygyny aňladýar. Bu maksatnama köp çagaly maşgalalara berilýän goldawyň iň möhüm görnüşleriniň biri bolmagynda galýar: häzirki wagta çenli ýurtda 151 müňden gowrak depozit hasaplary açyldy.

Maşgala maýasynyň täze möçberi üçünji ýa-da ondan soňky çagasy 2026-njy ýylda dünýä inen ýa-da ogullyga alnan maşgalalar üçin güýje girýär. Eger şatlykly waka 2025-nji ýylda bolup geçen bolsa, tölegiň möçberi 33 275 rubly düzýär.

Hünärmenler döwlet goldawynyň möçberiniň çaganyň doglan senesine görä kesgitlenýändigini ýatladýarlar. Ogullyga almak ýagdaýynda bolsa, kazyýetiň çözgüdiniň resmi taýdan güýje giren güni esasy ölçeg bolup durýar.

Bu serişdeler ene-atalara ýaşaýyş şertlerini gowulandyrmak, bilim ýa-da lukmançylyk hyzmatlaryny tölemek ýaly möhüm meseleleri çözmäge kömek edýär. Tölegleriň yzygiderli ýokarlandyrylmagy maksatnamanyň belarus maşgalalary üçin ygtybarly goldaw bolup galmagyny üpjün edýär.

ORIENT