Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
6-njy dekabrda Türkmenistanyň Prezidenti Serdar Berdimuhamedow Türkmenistanyň daşary ýurtlardaky diplomatik wekilhanalarynyň, konsullyk edaralarynyň we halkara guramalarynyň ýanyndaky wekilhanalarynyň ýolbaşçylarynyň gatnaşmagynda halkara işleriniň netijelerine we geljek 2026-njy ýyl üçin daşary syýasatda ileri tutulýan wezipeleriň kesgitlenmegine bagyşlanan Ministrler Kabinetiniň giňişleýin mejlisini geçirdi. Mejlis möhüm senäniň – Türkmenistanyň hemişelik Bitaraplygynyň derejesine eýe bolmagynyň 30 ýyllyk baýramynyň öňüsyrasynda geçirildi.
Döwlet Baştutany ýurduň daşary syýasatynyň hemişelik Bitaraplyk hukuk ýagdaýyndan hem-de Türkmenistanyň daşary syýasat ugrunyň 2022 – 2028-nji ýyllar üçin Konsepsiýasynda öňde goýlan wezipelerden ugur alýandygyny nygtady.
Mejlisiň dowamynda BMG-niň Baş Assambleýasy tarapyndan Türkmenistanyň başlangyjy bilen yglan edilen we birnäçe taryhy üstünlikler bilen tapawutlanan Halkara parahatçylyk we ynanyşmak ýylynyň esasy netijeleri jemlendi.
“Awaza” milli syýahatçylyk zolagynda geçirilen BMG-niň Deňze çykalgasy bolmadyk ösüp barýan döwletler boýunça üçünji maslahatynyň ähmiýeti bellenildi. Onuň netijeleri boýunça kabul edilen “Awaza” syýasy Jarnamasy we 2024 – 2034-nji ýyllar üçin Hereketleriň Awaza maksatnamasy BMG-niň Baş Assambleýasynyň Kararnamasy hökmünde kabul edildi.
Şeýle hem Baş Assambleýa tarapyndan Türkmenistanyň 2026 – 2028-nji ýyllarda Birleşen Milletler Guramasynyň Ykdysady we Durmuş geňeşiniň agzalygyna biragyzdan saýlandy.
Ýakyn günlerde Aşgabatda ýurduň halkara abraýyny has-da berkitmekde möhüm ähmiýete eýe boljak Halkara parahatçylyk we ynanyşmak ýylynyň wekilçilikli Forumy forumy geçiriler.
Geljek ýylda daşary syýasat we diplomatiýa işiniň esasy wezipesi – BMG-niň Baş Assambleýasy tarapyndan Türkmenistanyň başlangyjy boýunça kabul edilen kararnamalary öňe sürmek we durmuşa geçirmek bolup durýar. Hyzmatdaşlyk ikitaraplaýyn we köptaraplaýyn esasda giňeldiler.
Sebitleýin dialog: Goňşy döwletler bilen dialog ileri tutulýan ugur bolmagynda galýar: Merkezi Aziýa we Hazarýaka sebitiniň ýurtlary bilen gatnaşyklary pugtalandyrmak.
Ykdysady geçelgeler: Aziýadan Ýewropa ulag we üstaşyr geçelgesinde esasy halka hökmünde “Beýik Ýüpek ýoly” strategiýasynyň durmuşa geçirilmegi dowam eder. Ykdysady Hyzmatdaşlyk Guramasyna girýän döwletler bilen ýakyn hyzmatdaşlyk dowam etdirilýär.
Ýewropa ugry: Ýokary tehnologiýalar ulgamynda Ýewropa ýurtlary bilen hyzmatdaşlyga, ýaşyl energiýa geçişine we emeli aňy ornaşdyrmaga aýratyn üns berler.
Geografiýanyň giňelmegi: Günorta Aziýa, Ýakyn we Orta Gündogar, Aziýa-Ýuwaş ummany sebiti, şeýle hem Demirgazyk we Günorta Amerika ýurtlary we Afrika yklymy bilen gatnaşyklar has-da ösdürer.
2026-njy ýylyň esasy wakalarynyň hatarynda ýurduň baş baýramyny — Türkmenistanyň mukaddes Garaşsyzlygynyň 35 ýyllyk toýyny dabaraly bellenilmegi bar.
Şeýle hem, geljek ýyl Merkezi Aziýa döwletleriniň Baştutanlarynyň VIII konsultatiw duşuşygy Türkmenistanda geçiriler.
Şolar bilen birlikde geljek ýylda Türkmenistan Garaşsyz Döwletleriň Arkalaşygynda başlyklyk eder we özünde GDA-nyň döwlet Baştutanlarynyň Geňeşiniň nobatdaky mejlisi geçirer.
Mejlisiň ahyrynda döwlet Baştutany “Türkmenistanyň diplomatik gullugynyň maliýe meseleleri hakyndaky” Karara, şeýle hem ýurduň raýatlaryny hem-de daşary ýurt raýatlaryny “Türkmenistanyň Bitaraplygynyň 30 ýyllygyna” atly ýubileý medaly we ýadygärlik nyşany bilen sylaglamak hakyndaky resminamalara gol çekdi şeýle hem şu ýylyň jemlenmegi bilen bagly “Türkmenistanyň Bitaraplygy – parahatçylygyň we ynanyşmagyň aýdyň ýoly” atly kitabyny ýazyp tamamlandygyny aýtdy.
ORIENT