Özbegistanyň we Türkmenistanyň raýatlary «Şawat-Daşoguz» serhet söwda zolagynyň çägine wiza resmileşdirmezden girip bilerler diýip, Özbegistan Respublikasynyň Maýa goýumlar, senagat we söwda ministrliginiň (MGSSM) metbugat gullugy habar berdi.

Bu söwda zolagynyň işini uzak aradan Özbegistanyň Prezidenti Şawkat Mirziýoýew hem-de Türkmenistanyň Prezidenti Serdar Berdimuhamedow açdylar.

Söwda zolagynda iki döwletiň raýatlaryna we şol ýurtlaryň çäginde kanuny ýaşaýan raýatlygy ýok adamlara wizasyz tertip göz öňünde tutulyp, bu ýagdaý logistika we gümrük amallaryny ep-esli ýönekeýleşdirýär.

Bilelikdäki söwda merkeziniň umumy meýdany 6 gektara barabar: onuň 3 gektary Özbegistanyň, 3 gektary bolsa Türkmenistanyň paýyna düşýär. Zerur bolan ýagdaýynda Özbegistanyň Horezm welaýatynyň we Türkmenistanyň Daşoguz welaýatynyň çägindäki bu meýdan aýratyn halkara ylalaşygy bilen giňeldilip bilner.

Özbegistanyň maýa goýumlar, senagat we söwda ministri Laziz Kudratow hem-de Türkmenistanyň daşary ykdysady aragatnaşyklar ministri Nazardurdy Agahanow bilelikdäki söwda merkeziniň işiniň hukuk esaslaryny ylalaşdylar.

Bu desga özara haryt dolanyşygyny giňeltmek, milli önümleri öňe sürmek we serhetara telekeçiligi ösdürmek üçin möhüm meýdança hökmünde garalýar. «Özbek-türkmen serhet söwda zolagynyň açylmagy özbek we türkmen telekeçileriniň umumy infrastrukturany we ýönekeýleşdirilen amallary ulanmak bilen harytlaryny erkin satmaga mümkinçilik döreder» - diýip, MGSSM habar berdi.

Söwda zolagynda 112 söwda hatarlary, 28 dükan, 16 söwda nokady ýerleşýär we olar iki bölüme jemlenendir. «Şawat-Daşoguz» taslamasynyň üstünlikli işe girizilmegi synag taslamasy hökmünde garalýar. Döwlet Baştutanlary bu modeli giňeltmek mümkinçiliklerini hem ara alyp maslahatlaşdylar. Hususan-da, Buhara welaýatynyň Alat etrabynda we Lebap welaýatynyň Farap etrabynda şeýle söwda merkezlerini döretmek meselesi ara alnyp maslahatlaşylýar.

Bu ýagdaý Aşgabat we Daşkent tarapyndan umumy serhediň ähli çägi boýunça giňeldilip bilner ýaly doly we gerimli ikitaraplaýyn söwda merkezler ulgamyny döretmek ugrunda tagallalaryň edilýändigini tassyklaýar.

ORIENT