Türkmenistan Samarkantda ÝUNESKO-nyň işleri barada Milli toparlaryň mejlisine gatnaşdy
29.10.2025 | 22:00 |
Uzak ýyllardan soň ilkinji gezek ÝUNESKO-nyň 43-nji Baş maslahaty ÝUNESKO-nyň ştab-kwartirasynyň daşynda — Özbegistanyň Samarkant şäherinde geçirilýär. 29-njy oktýabrda bu maslahatyň çäginde Gurama agza ýurtlaryň ÝUNESKO-nyň işleri barada Milli toparlaryň 12-nji sebitara maslahaty geçirildi. Oňa türkmen tarapyndan ÝUNESKO-nyň işleri barada Türkmenistanyň Milli toparynyň jogapkär sekretary Çynar Rüstamowa gatnaşdy.
Duşuşyga ÝUNESKO-nyň Baş direktorynyň orunbasarlary, bu halkara guramasynyň degişli bölümleriniň ýolbaşçylary we agza ýurtlaryň ÝUNESKO-nyň işleri barada Milli toparlaryň ýerine ýetiriji sekretarlary derejesindäki wekilleri gatnaşdylar.
Maslahatyň açylyşynda ÝUNESKO-nyň Baş direktorynyň birinji orunbasary, Afrika we daşary gatnaşyklar boýunça Baş direktoryň kömekçisi Sin Çýuý hem-de ÝUNESKO boýunça Özbegistanyň Milli komissiýasynyň başlygy, ÝUNESKO-nyň işleri barada Özbegistanyö Milli toparynyň başlygy, Özbegistanyň sungaty we medeniýeti ösdürmek gaznasynyň başlygy, şeýle hem Özbegistan Respublikasynyň Prezidentiniň Diwanynyň döredijilik ykdysadyýeti we syýahatçylyk bölüminiň müdiri Gaýane Umerowa dagylar çykyş etdiler.
Bu çäräniň dowamynda “Ýaşlaryň parahatçylygy, adam hukuklaryny, durmuş integrasiýasy we durnukly ösüş üçin bilimi öňe sürmekde hukuklaryny we mümkinçiliklerini giňeltmek” we “Sanly döwürde medeniýetleri we jemgyýetleri birleşdirmek: miras, durnukly syýahatçylyk we Ýüpek ýoly”, "Milli toparlar strategik hyzmatdaşlar hökmünde: strategiýa, maksatnamalar we hyzmatdaşlyk ugrunda bilelikde işlemek” şeýle hem “Inklýuziw jemgyýetleri gurmakda we durnukly ösüş üçin ylmy ösdürmekde öňdebaryjy tejribeleri paýlaşmak” atly dört sany tematiki sessiýa geçirildi.
Üçünji sessiýanyň çägindäki çekişmede ÝUNESKO-nyň işleri barada Türkmenistanyň Milli toparynyň jogapkär sekretary hasabat bilen çykyş etdi we toparyň işiniň ileri tutulýan ugurlaryny we durnukly ösüş maksatlaryna ýetmekde halkara hyzmatdaşlygynyň ähmiýetini belledi. Türkmenistanyň ÝUNESKO-nyň işine işjeň gatnaşmagynyň halklaryň arasyndaky özara düşünişmegi pugtalandyrmaga we bilim, ylym, medeniýet we aragatnaşyk ulgamlarynda umumy maksatlary öňe ilerletmäge işjeň gatnaşýandygy nygtaldy.
ORIENT
Foto: orient.tm
Şeýle hem okaň:
