2025-nji ýylyň 7–12-nji oktýabry aralygynda Türkmenistanyň Küşt Federasiýasynyň (TKF) abraýly «Gran-prisiniň» nobatdaky dördünji tapgyry ilkinji gezek Mary şäherinde geçirildi. Halkara FIDE reýtingine girizilen bu ýaryşa 141 türgen gatnaşyp, jemleýji tapgyra çykmak ugrunda bäsleşdiler.

Ýaryşlar 9 tapgyrdan ybarat şweýsariýa ulgamynda, wagtyň klassiki gözegçiligi bilen geçirildi, bu bolsa ýokary derejeli bäsdeşligi üpjün etdi.

Zenanlaryň ýaryşy: Ýagşygeldi Kakaýew adyndaky Halkara nebit we gaz uniwersitetiniň talyby Leýla Şohradowa 9 utukdan 8,5 utuk toplap, ynamly öňdebaryjylygy tassyklady. Bu ýeňiş onuň «Gran-pri» seriýasyndaky ikinji üstünligi bolup, Leýla FIDE tarapyndan zenanlaryň arasynda halkara ussady derejesine (onun Elo reýtingi 2100-den geçdi) mynasyp boldy. Kümüş medaly Türkmen Döwlet Bedenterbiýe we sport institutynyň talyby Ogulsuraý Baýrambaýewa gazandy, bürünç medala bolsa Eneş Arazmedowa mynasyp boldy. Şeýlelikde, ähli baýrakly ýerleri paýtagtymyzyň küşt we şaşka mekdebiniň okuwçylary eýelediler.

Açyk toparça: Ýaryşyň ýeňijisi Türkmen Döwlet Bedenterbiýe we sport institutynyň talyby Amanmuhammet Hommadow boldy. Ol 8 utuk toplap, şu möwsümdäki «Gran-pri» seriýasynyň öz toparyndaky ikinji ýeňşini gazandy. Bürünç medala «Armageddon» görnüşindäki dartgynly blitz-duşuşygynda Şahruh Turaýew eýe boldy.

2025-nji ýylda esaslandyrylan TKF-niň «Gran-pri» seriýasy küşt sportunyň welaýatlarda ösdürilmeginde we täze zehinleriň ýüze çykarylmagynda möhüm orny eýeleýär. Indiki, jemleýji tapgyr Türkmenbaşy şäherinde geçiriler, ýeňijiler bolsa 2026-njy ýylyň Türkmenistanyň Ýokary ligasyna göni gatnaşmaga hukuk gazanarlar.

ORIENT