30-njy sentýabrda Türkmenistanyň Russiýa Federasiýasyndaky Ilçihanasynda ýurdumyzyň Garaşsyzlygynyň 34 ýyllygyna, hemişelik Bitaraplygynyň 30 ýyllygyna we Aşgabatda geçirilen Halk Maslahatynyň mejlisiniň netijelerine bagyşlanan brifing geçirildi.
Çärä žurnalistler, Russiýadaky türkmen diasporasynyň wekilleri hem-de rus ýokary okuw mekdeplerinde okaýan talyplar gatnaşdy. Oňa gatnaşyjylara Türkmenistanyň garaşsyz ösüş ýyllaryndaky üstünlikleriniň hem-de halkara arenasyndaky ornuny pugtalandyrmak ugrunda edýän tagallalarynyň giňişleýin panoramasy hödürlendi.
Çykyşlaryň dowamynda aýratyn üns, BMG-niň Baş Assambleýasynyň 80-nji sessiýasynda Türkmenistanyň Prezidenti Serdar Berdimuhamedow tarapyndan beýan edilen giň möçberli başlangyçlara, şeýle hem sentýabr aýynda kabul edilen «Bitarap Türkmenistanyň parahatçylyk we ynanyşmak syýasatynyň hukuk esaslary hakynda» Konstitusion Kanunyň ähmiýetine gönükdirildi. Bu resminama döwletiň parahatçylyk döredijilik ýörelgesini pugtalandyrmakda strategik ädim hökmünde häsiýetlendirildi.
Çykyş edenler häzirki ýylyň ähmiýetini nygtap geçdiler, sebäbi onda birnäçe möhüm seneler — Türkmenistanyň Bitaraplygynyň 30 ýyllygy we Birleşen Milletler Guramasynyň 80 ýyllygy bellenilýär. Bu ugurda dekabr aýynda Aşgabatda geçiriljek ýokary derejeli halkara forum möhüm waka hökmünde bellenildi.
Brifinge gatnaşyjylar Türkmenistanyň Prezidenti Serdar Berdimuhamedowyň hem-de türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň eserleri bilen hem tanyş boldular. Duşuşyk bolsa ýurdumyzyň garaşsyz ösüş ýolundaky üstünliklerini açyp görkezýän surat sergisi we wideoşekilli görkeziliş bilen tamamlandy.
ORIENT
