Biz ýakynlaşmagy ugur edinýäris

Moskwanyň Halkara Söwda Merkezinde geçirilen Bütindünýä jemgyýetçilik Assambleýasynyň çäginde «Dünýäniň Çagalary: dostlaşmak wagty» atly Bütindünýä döredijilik festiwalynyň ýeňijilerini sylaglamak dabarasy geçirildi.

Türkmenabat şäherindäki Çagalar sungat mekdebiniň okuwçysy Aziza Bäşimowa bu bäsleşigiň Baş baýragyna mynasyp boldy. 2025-nji ýylyň mart – awgust aýlarynda geçirilen festiwal 5 ýaşdan 15 ýaş aralygyndaky çagalary we ýetginjekleri birleşdirdi. Festiwala dünýäniň 70 ýurdunyň zehinli çagalarynyň gatnaşmagy aýratyn täsir galdyrdy.

Festiwal «Açyk ýürekler» ilata kömek bermek, ösdürmek we goldamak boýunça haýyr-sahawat gaznasy hem-de maşgala institutyny we adaty maşgala gymmatlyklaryny goldaýan «Atalaryň bileleşigi» Bütinrussiýa jemgyýetçilik guramasy tarapyndan guraldy.

Bäsleşigiň eminler toparyna suratkeş, şahyr we jemgyýetçilik işgäri, Mark Şagalyň çowlugy Irina Markowa-Şagal ýolbaşçylyk etdi. Festiwal RF-niň Prezidentiniň çagalaryň hukuklary boýunça ygtyýarly wekili Mariýa Lwowa-Belowanyň goldawy bilen geçirildi.

Bäsleşige dürli tehnika arkaly ýerine ýetirilen işler: peýzažlar, tebigat we taryhy wakalaryň şekilleri, ülkäniň tebigaty, maşgala durmuşynyň, ýadygärlikleriň, baýramçylyk dabaralarynyň şekilleri we portretler kabul edildi. Ugurlar: «Meniň dünýäm», «Aragatnaşygyň şatlygy», «Agzybir maşgala» we «Gelejek baradaky arzuwlar».

Türkmenistan üçin bu ýeňiş aýratyn ähmiýete eýedir, sebäbi şu ýylda Türkmenistanyň hemişelik, oňyn Bitaraplyk derejesine eýe bolmagynyň 30 ýyllygy bellenilýär. Bu dereje üç gezek BMG-niň Baş Assambleýasynyň ýörite kararnamalary bilen tassyklanyldy.

Türkmenistanyň başlangyjy bilen BMG-niň Baş Assambleýasy 2025-nji ýyly «Halkara larahatçylyk we ynanyşmak ýyly» diýip yglan etdi. Bu hem ähli döwletlere syýasy, dünýägaraýyş we amaly nukdaýnazarlary öz içine alýan umumy hyzmatdaşlyga çagyryş bolup hyzmat edýär. Parahatçylyk we ynanyşmak düşünjesi häzirki zaman dünýä gurluşynyň esasy ýörelgesi hökmünde kabul edilýär.

Hut dünýäni köp manyly düşünje we häzirki zaman medeniýetiniň iň ýokary gymmatlygy hökmünde şekillendirmek maksadyna eýerip, dürli milletden bolan, durmuş mümkinçiligi we saglyk ýagdaýy bolan ähli ýaş toparyndaky çagalaryň arasynda «Dünýä Çagalary: dostlaşmak wagty» atly Bütindünýä döredijilik festiwaly geçirildi. Çünki Ýer planetasynyň geljegi diňe şu günki dünýäniň çagalaryna degişlidir!

Sungat, parahatçylykly ýaşamagyň, sabyr-takatlylygyň we özara düşünişmegiň ilerledilmeginde möhüm orun eýeleýär. Guramaçylar ýaşlary jemgyýetçilik diplomatiýasyna çekýän şeýle taslamalar halkara gatnaşyklarynyň geljegini gurmaga we döwletleriň arasyndaky dartgynlygy azaltmaga kömek edýändigine ynanýarlar.

ORIENT

Foto: Guramaçylar tarapyndan berlen