Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Halkara sergi-ýarmarkasy Kids Expo 2025-iň guramaçylary bütin dünýäde meşhur bolan ýat türgenlemek we aň taýdan ösüş boýunça türkiýeli hünärmen, jenap Melik Duyaryň bu baýramçylygyň hormatly myhmany boljakdygyny uly buýsanç bilen habar berýärler. Onuň Türkmenistana gelmegi mental arifmetika ugrunda möhüm wakalaryň biridir.
Jenap Melik Duyar, giňden “Ýatda saklamagyň jenaby” ady bilen tanalýan türkiýeli tälimçi we guramaçydyr. Ol ýat türgenlemek, mental arifmetika we çalt okamak bilen meşgullanýar. Şeýle-de, ol Guinness rekordlar kitabyna Bütindünýä mental ýat olimpiadasynyň esaslandyryjysy hökmünde girizildi.
Ol şekilleri ýatda saklamak boýunça dünýä çempiony bolup, dünýäniň iň gowy zehinlerini mental hasaplama, çalt okamak we ýat türgenlemek boýunça birleşdirýän MEMORIAD atly dünýäniň mental sport olimpiadasynyň hem esaslandyryjysydyr. Onuň bu sergä gelmegi Kids Expo-nyň halkara derejesini hem-de zehinleri ösdürmek boýunça öňdebaryjy meýdança hökmünde ähmiýetini görkezýär.
Serginiň çäginde mental arifmetika boýunça olimpiadanyň finaly geçiriler. Şol möhüm çärede jenap Melik Duyar aýratyn myhman hökmünde gatnaşar. Onuň şahsy gatnaşmagy öz zehinlerini görkezýän ýaşlara güýçli ruhlandyryjy çeşme bolar. Şeýle derejedäki hünärmeniň gatnaşmagy Kids Expo-nyň diňe bir gyzykly şowhun däl, eýsem çagalaryň ylyma, bilime bolan söýgüsini ösdürýän täze sepgitleri açýandygyny tassyklaýar.
Jenap Melik Duyaryň bu sergä gatnaşmagy türkmen mugallymlary, ene-atalar we çagalaryň mümkinçiliklerini ösdürmek isleýän ähli adamlar üçin ajaýyp mümkinçilikdir. Onuň bu sapary Kids Expo-nyň dünýäniň iň gowy tejribeleriniň zehinli çagalar bilen gabat gelýän ýeridigini subut edýär.
Bu taryhy wakanyň bir bölegi bolmagy elden gidirmäň! Sizi Kids Expo-a çagyrýarys, sergi awgust aýynyň 21–23-ne Türkmenistanyň Söwda-senagat edarasynyň Sergi merkezinde geçiriler.
