2025-nji ýylyň 18–19-njy sentýabrynda Aşgabat şäherinde geçiriljek Türkmenistanyň Maýa goýum forumyna (TIF 2025) gatnaşmak üçin resmi onlaýn hasaba alyş başlandy. Forum Merkezi Aziýanyň iň möhüm ykdysady çäreleriniň biri bolup, halkara işewürlik, döwlet edaralary we hünärmenler jemgyýetiniň wekillerini bir ýere jemlär. Forumyň dowamynda strategik pudaklaryň ösdürilmegine — energetika, ulag, oba hojalygy we täze tehnologiýalar ýaly ugurlara aýratyn üns berler.

Bu çäre Türkmenistanyň maýa goýum mümkinçiliklerini tanyşdyrmak, geljegi uly infrastruktura taslamalaryny ara alyp maslahatlaşmak we işewürlik bilen döwlet edaralarynyň arasynda netijeli hyzmatdaşlygy ýola goýmak üçin täsirli işewürlik meýdançasyna öwrüler. Forum uzak möhletleýin hyzmatdaşlygy ýola goýmagy, bilelikdäki başlangyçlary ösdürmegi hem-de ýurdumyzyň ykdysadyýetiniň möhüm pudaklaryny diwersifikasiýalaşdyrmaga we döwrebaplaşdyrmaga goldaw bermäge gönükdirilendir.

Iki günlük forumyň dowamynda gatnaşyjylar ýurdumyzyň esasy ykdysady başlangyçlary bilen tanyşar, tematik panel çykyşlaryna we taslama tanyşdyrylyşlaryna gatnaşar, B2B we B2G görnüşinde duşuşyklary geçirer, şeýle-de hünärmenleriň usulyýet sapaklaryna hem-de medeni we protokol çärelerine gatnaşyp bilerler. Hasaba alyş forumyň resmi web sahypasynda — www.tif-turkmenistan.com elýeterlidir. Arzalary kabul etmegiň soňky güni — 2025-nji ýylyň 4-nji sentýabry.

TIF 2024-niň netijeleri bu forumyň netijeliligini doly tassyklady: geçen ýylky forumda 44 döwletiň wekili bolan 404 sany daşary ýurtly gatnaşyjy gatnaşdy, şol sanda 22 halkara guramanyň we 40 diplomatik wekilligiň wekilleri hem bardy. Programmanyň çäginde 3 sany plenar mejlis, 7 sany ugurlaýyn sessiýa we 4 sany tegelek stol maslahatlary geçirildi. Jemi 116 sany çykyş guraldy, şonuň 74-si daşary ýurtly wekiller tarapyndan ýerine ýetirildi (şolaryň 16-sy onlaýn görnüşde). Forumyň netijeleri boýunça 9 sany özara düşünişmek hakyndaky Ähtnama, 5 sany ylalaşyk we 8 sany şertnama, jemi 166,9 million ABŞ dollary möçberindäki hyzmatdaşlyklar baglaşyldy, şeýle hem 80-den gowrak iş duşuşygy geçirildi.

TIF 2025 forumy açyklyga, amaly dialoga we netijeli hyzmatdaşlygy ýola goýmaga, bilelikdäki başlangyçlary durmuşa geçirmäge hem-de Türkmenistanyň maýa goýum ýagdaýyny mundan beýläk hem ösdürmäge gönükdirilen ugruny dowam etdirýär. Bu waka ýurdumyzy halkara ykdysady giňişlikde öňe sürmekde möhüm ädim bolar.

Goşmaça maglumat üçin aşakdaky telefon belgisi boýunça ýüz tutup bilersiňiz:+993 (71) 87-18-14 ýa-da elektron poçta arkaly ýüz tutup bilersiňiz: contact@turkmencongress.com