Biziň yhlasymyz – adamlary ýakynlaşdyrmak
Habarlar
Makalalar
Media
Anons
Tehnologiýalar
Biz barada
Habarlaşmak üçin
||
Türkmenistanyň Belgiýadaky Ilçihanasy 14-nji martda Brýusseliň Egmont köşgünde geçirilen “Team Belgium Global Gateway” tegelek stoluna işjeň gatnaşdy. Belgiýanyň Daşary işler ministrligi ýurduň öňdebaryjy ykdysady agentlikleri bilen hyzmatdaşlykda gurnalan bu çäre Merkezi Aziýa sebitinde, şol sanda Hazarüsti ulag geçelgsinde maýa goýum hyzmatdaşlygy ara alyp maslahatlaşmak üçin döwlet edaralarynyň wekillerini, işewürler topary we bilermenleri bire ýere jemledi.
Türkmenistanyň Ilçihanasynyň geňeşçisi öz çykyşynda gatnaşyjylara ýurduň ykdysadyýetiniň depginli ösüşi, onuň amatly strategik we maýa goýum ýagdaýy barada giňişleýin maglumat berdi. Türkmenistanyň söwda, logistika we senagat ýaly möhüm ugurlarda Belgiýa we Ýewropa Bileleşigi bilen özara peýdaly hyzmatdaşlygy giňeltmäge bolan islegi nygtaldy.
Türkmen tarapynyň çykyşynda ulag we logistika infrastrukturasynyň ösdürilmegine aýratyn üns berildi. Ilçihananyň geňeşçisi, ýük dolanyşygy ýylda 17 million tonnadan gowrak bolan Türkmenbaşy Halkara deňiz portunyň ýewraziýa söwdasynda iň möhüm baglanyşyga öwrülýändigini aýtdy. Şeýle hem Türkmenistanyň uzunlygy 5000 km bolan demir ýol ulgamynyň ösüşi, terminallaryň döwrebaplaşdyrylmagy we ulag pudagynda sanly tehnologiýalaryň işjeň ornaşdyrylmagy bilen baglanyşykly Belgiýanyň kompaniýalary üçin açyljak mükinçilikler hem beýan edildi.
Çykyşyň möhüm tarapy Türkmenistanyň energetika syýasaty boldy. Diplomat Hazarüsti gaz geçiriji taslamasynyň Ýewropa Bileleşiginiň energetika howpsuzlygy, şeýle hem Gündogar-Günbatar gaz turbageçirijisiniň milli gaz daşamak ulgamynyň esasy elementi hökmünde strategiki ähmiýetine ünsi çekdi. Munuň bilen birlikde, ýurtda “ýaşyl” energiýanyň işjeň ösüşi, şol sanda gün ýel elektrik stansiýalaryny gurmak taslamalary we “akylly” Arkadag şäher konsepsiýasy barada maglumat berildi.
Tegelek stolda Türkmenistanyň gurluşyk we senagat pudaklaryna maýa goýum mümkinçilikleri ara alnyp maslahatlaşyldy. Belgiýa kompaniýalarynyň wekillerine ýokary tehnologiýaly senagat zolaklaryny giňeltmek, mineral serişdeleri gaýtadan işleýän häzirki zaman kärhanalary döretmek we dag-magdanlary gazyp almak işinde durnukly usullary ornaşdyrmak üçin mümkinçilikler hödürlendi. Sebitdäki ulag aragatnaşygyny gowulandyrmaga gönükdirilen uzunlygy 600 km bolan ýokary tizlikli Aşgabat-Türkmenabat awtomobil ýolunyň gurluşygy esasy infrastruktura taslamasy hökmünde bellendi.
Tanyşdyrylyşyň esasy pursatlarynyň biri Türkmenistanda saglygy goraýyş ulgamynyň we derman senagatynyň ösüşi baradaky maglumatlar boldy. Foruma gatnaşyjylaryň esasy ünsi, Arkadag şäherinde ýurduň derman serişdelerini we lukmançylyk enjamlaryny öndürmekde öz-özüni üpjün etmegini üçin ösen lukmançylyk klasteriniň dörelýändigine çekildi. Türkmen tarapy Belgiýanyň lukmançylyk enjamlaryny öndürijilerini, saglygy goraýyş pudagyna maýa goýujylary we derman serişdelerini öndürýän kompaniýalary bu strategiki möhüm ugurda işjeň hyzmatdaşlyga çagyrdy.
Foruma gatnaşyjylaryň arasynda Jan De Nul, DEME, Port of Antwerp-Bruges, Sarens we Elia Grid International ýaly Belgiýanyň öňdebaryjy kompaniýalarynyň ýolbaşçylary we wekilleri Türkmenistanda iri infrastruktura we logistika taslamalaryna gatnaşmagyň mümkinçiligine gyzyklanma bildirdiler.
Türkmenistanyň Belgiýadaky Ilçihanasynyň bu tegelek stola gatnaşmagy ýurduň Belgiýa we Ýewropa Bileleşigi bilen söwda-ykdysady gatnaşyklary pugtalandyrmak isleginiň ýene bir tassyknamasy boldy. Çäräniň jemleri boýunça, ikitaraplaýyn gepleşikler geçirildi. Onuň dowamynda anyk taslamalary durmuşa geçirmekde hususy pudagy çekmek we innowasiýa maliýeleşdiriş mehanizmlerini ulanmagyň geljegi ara alnyp maslahatlaşyldy.
ORIENT
Ýene-de şu mowzuk boýunça:
Brýusselde Hazar üsti ulag geçelgesiniň mümkinçilikleri boýunça maslahat
