Türkmenistanyň Daşary işler ministriniň orunbasary Ahmet Gurbanow 3-nji fewralda Tähranda geçirilen Ykdysady hyzmatdaşlyk guramasynyň Daşary işler ministrleriniň orunbasarlarynyň Ýokary derejeli komitetiniň 1-nji mejlisiniň işine gatnaşdy.

Şeýle hem mejlise sebit guramalarynyň, ýöriteleşdirilen düzüm birlikleriň, sebit institutlarynyň we YHG-nyň bölümleriniň ýolbaşçylary gatnaşdy.

Gün tertibine YHG-nyň çäginde maliýe we býudjet hyzmatdaşlygyny ösdürmek, “YHG göz ýetiriş 2025” (“ECO Vision 2025”) maksatlarynyň ýerine ýetirilişine garamak we bu köptaraplaýyn gurluşyň işleýiş mehanizmlerini kämilleşdirmek meseleleri girizildi.

Ahmet Gurbanow hyzmatdaşlygyň ileri tutulýan ugurlary boýunça Türkmenistanyň garaýyşlaryny we YHG-nyň ösüş strategiýasy baradaky tekliplerini beýan etdi. Türkmenistanyň Durnukly ulag baglanyşygynyň Ählumumy Atlasyny, Ählumumy energetika howpsuzlygy we durnuklylygy boýunça hyzmatdaşlygyň Bileleşigini döretmek we ýapyk aýlanyşykly ykdysadyýete geçmekde durnukly ösüş baradaky tekliplerine ünsi çekdi.

Şonuň bilen birlikde, sebitleýin integrasiýa, syýahatçylygy ösdürmek, adam maýasyny we institusional mümkinçilikleri güýçlendirmek üçin gural hökmünde YHG-nyň Söwda ylalaşygynyň netijeli durmuşa geçirilmeginiň ähmiýeti bellendi.

Mejlisiniň meýdançasynda Türkmenistanyň Daşary işler ministriniň orunbasary bilen YHG-nyň Baş sekretary Asad Majid Hanyň arasynda gysga wagtlaýyn duşuşyk geçirildi. Taraplar Türkmenistan bilen YHG-nyň arasynda köptaraplaýyn hyzmatdaşlygyň ýagdaýy we geljegi barada pikir alyşdylar.

ORIENT