Biz ýakynlaşmagy ugur edinýäris

2025-nji ýylyň 17-nji ýanwarynda Türkmenistanyň Mejlisiniň Başlygy Dünýagözel Gulmanowa bilen Özbegistan Respublikasynyň Adatdan daşary we Doly ygtyýarly ilçisi Rawşanbek Alimowyň arasynda duşuşyk geçirildi.

Mejlisiň Başlygy ilçini bu ýokary diplomatik wezipä bellenmegi bilen gutlady we oňa goňşy ýurtlaryň arasyndaky dostlukly gatnaşyklary we özara bähbitli hyzmatdaşlygy has-da berkitmek boýunça alyp barjak işlerinde uly üstünlikler arzuw etdi.

Duşuşykda ilçi ýurduň içerki we daşary syýasatynyň ileri tutulýan ugurlary, milli Parlamentiň düzümi we dürli ugurlarda giň gerimli durmuş-ykdysady özgertmeleriň hukuk taýdan üpjün edilmegi ugrunda alnyp barylýan işler bilen tanyşdyryldy. Ýurduň sebitleýin we dünýä derejesinde parahatçylygyň, durnuklylygyň we gülläp ösüşiň esaslaryny berkitmek boýunça başlangyçlarynyň ähmiýetine aýratyn üns berildi.

Duşuşygyň barşynda taraplar pikir alyşdylar we abraýly halkara guramalarynyň we olaryň düzümleýin edaralarynyň çäklerinde parlamentara gatnaşyklaryň halkara derejesinde ösdürilmegine özara gyzyklanma bildirýändiklerini nygtadylar.

ORIENT news

Foto: mejlis.gov.tm