Hytaý Halk Respublikasynyň Başlygy Si Szinpin ABŞ-nyň saýlanan prezidenti Donald Tramp bilen telefon arkaly gepleşdi diýip, «Sinhua» habar gullugy mälim etdi. Emma agentlik gepleşigiň mazmuny barada jikme-jik maglumat bermedi.

Soňra Donald Tramp özüniň «Truth Social» sosial ulgamyndaky hasabynda hytaý lideri bilen gepleşik geçirendigini tassyklady we şeýle diýip ýazdy: «Başlyk Si bilen men dünýäni has parahat we has howpsuz etmek üçin elimizden gelenini ederis!». Trampyň aýtmagyna görä, olar söwda meselelerini we gysga wideo TikTok platformasyny ara alyp maslahatlaşdylar. Bu platforma ABŞ-da ýakyn günlerde gadagan edilip bilner.

TikTok platformasyny gadagan edilmegi baradaky başlangyjy ABŞ-nyň häzirki prezidenti Jo Baýden öňe sürdi. Ol 2024-nji ýylyň aprelinde Hytaýyň ByteDance kompaniýasyndan TikTok platformasynyň ABŞ-daky işlerini 2025-nji ýylyň 19-njy ýanwaryna çenli bes etmegini talap edýän kanuna gol çekdi.

ORIENT news