Bolgariýa Halk ýygnagynyň deputaty, «Raýatlar Bolgariýanyň ýewropa taýdan ösüşini goldaýar» (RBÝTÖ) partiýasynyň we Demokratik güýçleriň birleşigi (DGB) koalisiýasynyň wekili Rosen Želýazkow respublikanyň täze premýer-ministri wezipesine saýlanyldy. Bu barada TASS habar berýär. Ses berlişik parlamentiň resmi web sahypasynda göni efirde görkezildi.

Želýazkowy goldap 125 deputat ses berdi. Olaryň arasynda RBÝTÖ -DGB, “Bolgar sosialistik partiýasy – Bitewi çepler” koalisiýasy, “Şeýle bir halk bar” partiýasy we “Demokratiýa, hukuklar we azatlyklar” (DHA) koalisiýasynyň wekilleri bardy. Garşy 114 deputat ses berdi, saklananlar bolmady. Şeýle hem, täze hökümet düzümindäki 19 ministriň ählisi biragyzdan goldanyldy.

Ses berişlikden soň, hökümetiň ähli agzalary kasam kabul etdi. Olar ýakyn wagtda dolandyryş ygtyýarlyklaryny öz üstüne alar.

Debatlar we ses berişlik wagtynda mejlis zalyna Prezident Rumen Radew, Bolgariýanyň Patriarhy we Sofiýanyň Mitropoliti Daniýil, diplomatik korpusyň wekilleri hem-de köp sanly myhman gatnaşdy. Prezident täze hökümetiň saýlanmagyny gutlap, onuň işine üstünlik arzuw etdi. «Bolgariýanyň milli bähbitlerini goraýan durnukly we ygtybarly hökümete zerurlygy bardy. Bu hökümet syýasy krizisi soňlamak we yzygiderli saýlawlara ýol bermezlik üçin döredildi. Oňa ýurt dolandyryşynda üstünlik arzuw edýärin» diýip, Radew aýtdy.

ORIENT news