“Sungat çatrygy” atly taslamasy barha işjeňleşýär we ösüşiniň her täze wakasy barha gyzykly we tolgundyryjy bolýar. Bu gezek näme boldy?

Şol gün çagalar we ulylar Aşgabat şäherindäki Bäşim Nuraly adyndaky çagalar çeperçilik mekdebinde kömekçileriň zalda oturgyçlary tertipleşdirýändiklerine, sergi üçin ýeňil enjamlary gurandygyna we suratlarynyň ýerleşdirilişine tomaşa edip, biri-birine gyzyklanma bilen soradylar: “Kime garaşýarys?”. Şeýlelik bilen, hemmelere zalda öz ýerlerine geçip oturmaklaryny haýyşt etdiler. Onuň merkezinde syrly myhman üçin oturgyç bardy we oturgyjyň gapdalynda eýýäm bir käsede hoşboý ysly çaý bugaryp durdy.

Daşardan demir derwezäniň sesi eşidilýär. Hemmeler başlaryny penjire tarap öwürdiler. Ine mekdebiň howlusyna ýylgyryp Türkmenistanyň halk artisti, aýdymçy Atageldi Garýagdyýew girdi. Tomaşaçylaryň zaly seslendi, mekdebiň müdiri myhmany garşylamaga howlukdy. “Sungatyň çatrygy” atly taslamasynyň ýolbaşçylary kompozitor we žurnalist Aýna Şirowanyň hem-de Bäşim Nuraly adyndaky Çagalar çeperçilik mekdebiň müdiri Öwezgeldi Ýagmyrowyň haýyşty boýunça meşhur aýdymçy çagalar bilen söhbetdeş bolmaga şeýle-de özüniň iň gowy aýdymlaryny aýtmak üçin duşuşmaga geldi.

Zalyň merkezine barýan ýoluň ugrundaky portretler galereýasyndaky ýaş suratkeşler tarapyndan döreden belli sungat işgärleriniň suratlaryna Atageldi Garýagdyýew göz aýlady. Ol ýerden öz portretini tapyp we barmagy bilen portretini görkezip: “Men olaryň hemmesini tanaýaryn. Mundan başgasyny” diýip, degişdi.

Hemmeler gyzykly söhbetdeşlige taýýardylar, çagalar meşhur aýdymça köp sorag bermek islediler, kimdir biri hemme zady kamerada surata alýardy, birnäçe okuwçy portret üçin eskiz taýýarlamak üçin kagyz we galam bilen taýyn otyrdylar.

Çagalaryň we ulularyň soraglary dürli-dürli boldy. Olara jogap berip Atageldi Garýagdyýew, 8-nji synpdan soň uzak obadan sungat mekdebine ýazylmak üçin gelendigini aýtdy. Ine gynandyrýan ýeri! Synaglar bir aý töweregi öň bolup geçipdir. Ol bialaç öýüne dolanyp, 9-njy we 10-njy synplary okamaly boldy. Soňra ol täzeden paýtagdy özüne maýyl etmek üçin gitdi. Çagalykdan onuň owadan sesi bardy we aýdym aýtmagy söýärdi, oňa D.Öwezow adyndaky ýörite sazçylyk mekdebine giriş synagyny tabşyrmaga synanyşmagy maslahat berdiler. Aýdym-saz mekdebini tamamlandan soň, Garýagdyýew P.I Çaýkowskiý adyndaky Moskwanyň konserwatoriýasyna okuwa gitdi. Birnäçe wagtdan soň bolsa Uly teatrda (Bolşoý teatrda) tejribelik geçdi.

Köp ýyllaryň dowamynda köp opera eserlerinde baş rollary ýerine ýetirdi. Onuň mahmal owazy Aşgabadyň sazly-drama teatrynyň ýüzi boldy. Görnükli türkmen şahyrlary we kompozitorlary onuň üçin ýörite aýdym-sazlary ýazýarlar. Aýratynam ol Gurbannazar Ezizow we Nury Halmammedow bilen dostlugyna buýsanýar.

Tomaşaçylaryň soraglaryna jogap beren meşhur aýdymçy, repertuaryndan aýdymlary hem ýerine ýetirdi. Belli bir pursatda, kompozitor Kerimguly Garowowyň “Mähriban gyzym” aýdymyna nobat ýetdi. Aýna Şirowa ýuwaşlyk bilen Garowowa jaň etdi we aýdyşlary ýaly göni aragatnaşykda öz döreden eseriniň ýerine ýetirilişini diňledi. Bu diňe bir onuň üçin garaşylmadyk sowgat bolmady. Haçan-da Garýagdyýew telefonyň aňyrsynda hut kompozitoryň özüdigini bilende, salam berdi we owadan aýdymy üçin minnetdarlyk bildirdi.

Söhbetdeşligiň dowamynda Atageldi Garýagdyýew türkmen, italýan we rus dillerinde aýdym aýtdy. Bu eserleriň döreýşiniň taryhy, awtorlary bilen dostlugy hakda gürrüň berdi. Maşgalasy baradaky soraglara jogap berip, aýdymçy eýýäm sekiz gezek ata bolandygyny aýtdy. Onuň agtyklary aýdym-saz mekdebinde okaýarlar.

—Biziň hemmämiz siziň bilen kärdeş. Sebäbi sungatyň ähli görnüşleriniň gözbaşlary birmeňzeş. Biziň siziň bilen wezipämiz – halka hyzmat etmek. Ähli sungatlar kesişýär we deňeçer ösýär” – diýip, ol “Sungatyň çatrygy” atly taslamanyň esasy pikirini tassyklaýan ýaly aýtdy.

Atageldi Garýagdyýew bilen duşuşyk ahyrlap barýar we hemmeler onuň bilen surata düşmek islediler. Çagalar oňa şeýle baý many-mazmunly söhbetdeşligiň dowamynda çeken portretlerini sowgat berdiler.

Aýna Ýolbarsowa