Biz ýakynlaşmagy ugur edinýäris

Türkmenistanyň bilim ulgamynyň wekilleri Aziýa Ösüş Bankynyň Merkezi Aziýada Sebitleýin Ykdysady Hyzmatdaşlyk (CAREC) maksatnamasy boýunça Merkezi Aziýa ýurtlarynyň orta hünär biliminiň işgärleri üçin Hytaý Halk Respublikasynda guramagyndaky toplumlaýyn okuwlara gatnaşýar.

Türkmenistanyň Bilim ministrliginiň habar bermegine görä, 9-13-nji dekabr aralygynda geçirilýän okuwlara Aşgabat şäherindäki syýahatçylyk orta hünär okuw mekdebiniň hem-de Türkmenistanyň Telekommunikasiýalar we informatika institutynyň “Infokommunikasiýa” hünär-tehniki okuw mekdebiniň wekilleri gatnaşýarlar.

Okuw saparynyň başynda Hytaý Halk Respublikasynyň Guansi-Çžuan awtonom welaýatynyň Bilim departamentiniň ýolbaşçylarynyň we Aziýa Ösüş Bankynyň Adam we sosial ösüş pudagynyň direktory Sofiýa Şakiliň ýolbaşçylygyndaky toparyň hem-de Merkezi Aziýa ýurtlaryň orta hünär biliminiň işgärleriniň bilelikdäki maslahaty geçirildi, Hytaý Halk Respublikasynyň Guansi-Çžuan awtonom welaýatynyň birnäçe orta hünär bilim edaralarynda bilimiň hiliniň ýokarlanmagy we ösüş depgini, dolandyryş düzgünleri, hukuk kadalaşdyryjy resminamalary hem-de pudaklaýyn edaralarynyň özara hyzmatdaşlyklary hakynda çykyşlar guraldy.

Çykyşlaryň dowamynda Hytaý Halk Respublikasynda häzirki wagtda orta hünär bilim maksatnamasy boýunça bilim berilmegine, maddy-üpjünçilik binýadynyň has-da gowulandyrylmagyna we döwrebap tehnologiýalar bilen yzygiderli üpjün edilmegine, birnäçe täze innowasion bilim binalarynyň gurulmagyna aýratyn üns berilýändigi we bu işleriň öz wagtynda maliýeleşdirilmeginiň bir bölegi Aziýa Ösüş Banky tarapyndan amala aşyrylýandygy hakynda aýdyldy. Soňra ähli wekilleriň gatnaşmagynda Guansi hünär-tehniki mekdebinde (kollejinde) tanyşdyryş duşuşyklary geçirildi. Bu bilim edaranyň çäginde ýerleşdirilen sergi otaglaryň, önümçiligiň döwrebap tehnologiýalary bilen ornaşdyrylan ýörite tejribehanalaryň, robottehnikanyň, VR, AR tehnologiýanyň kömegi bilen önümçilik işleriniň alnyp barylyşyny öwredýän otaglaryň mümkinçilikleri bilen tanyşdyryldy. Mekdebiň ýolbaşçylary, mugallymlary we talyplary bu döwrebap tehnologiýalary bilen ornaşdyrylan tejribehanalaryň döredýän mümkinçilikleri, önümçilik kärhanalaryň talaplarynyň häzirkizaman standartlara laýyklykda gurnalan binalaryň şertleri, häzirki wagtda ýaşlara bilim bermekde täze şertleri döredýändigini buýsanç bilen bellediler.

Guansi-Çžuan awtonom welaýatynyň Nannin şäherinde ýerleşen Guansi elektrotehniki-politehniki institutynyň binýadynda hereket edýän 7 sany orta hünär mekdepleriniň aýratynlyklary we özara hyzmatdaşlykda alnyp barylýan işleriniň depginleri barada tanyşdyryldy. Bu orta hünär mekdeplerinde elektroenergetiki tehnologiýalarynyň emele getirilişi, ulag logistikanyň innowasion çözgütleriniň öwrenilişi, gaýtadan dikeldilýän energiýa enjamlarynyň önümçiliginiň ýola goýulşy, halkara hyzmatdaşlyk esasynda bilim alýan ýaşlaryň dünýä tejribelerini özleşdirişleri hakynda we başga-da birnäçe çykyşlar üsti tejribeler paýlaşyldy.

Bu guralan okuw saparyň soňky günlerinde Luçžou şäheriniň demirýol hünär-tehniki okuw mekdebiniň we Luçžou şäheriniň poltehniki uniwersitetiniň ýanyndaky orta hünär okuw mekdepleriniň ulag-aragatnaşyk ulgamynda döredilen mümkinçilikleri bilen tanyşmak şeýle-de Guilin şäherindäki Guilin syýahatçylyk uniwersitetiniň gazanan tejribeleri, dolandyryş düzgünleri, alyp barýan taslama işleri bilen tanyşmak hem meýilleşdirilýär.

ORIENT news

Foto: education.gov.tm