Tramp, Florida ştatynda tarapdarlarynyň öňünde eden çykyşynda ABŞ-nyň prezident saýlawlarynda ýeňşini eýýäm yglan etdi
ABŞ-nyň prezident saýlawynda milliarder Respublikan partiýasyndan dalaşgär Donald Tramp 270-den gowrak saýlawçylaryň sesini alyp, wise-prezident Kamala Harrisden öňe geçdi. Bu barada Amerikan öpçülikleýin habar beriş serişdeleriniň çaklamalary görkezýär, ýöne ses berişligiň soňky netijeleri entek belli däl.
Trampyň özi, tarapdarlaryna ýüzlenmek üçin eýýäm Florida geldi. Çykyşyň dowamynda özüni Amerikanyň Birleşen Ştatlarynyň 47-nji saýlanan prezidenti diýip yglan etdi we amerikalylara “altyn asyry” wada berdi.
“Her gün men siziň üçin göreşerin. Çagalarymyzyň we siziň hemmäňiziň mynasyp bolan howpsuz we abadan Amerikany kemala getirýänçam men arkaýynlaşmaryn. Bu Amerikanyň altyn asyry bolar” – diýyp, Respublikan partiýasynyň agzasy mälim etdi.
Donald Tramp Pensilwaniýa, Jorjiýa, Demirgazyk Karolina, Newada, Arizona, Miçigan we Wiskonsin ýaly “ikirjiňlenýän” ştatlarynda öňdeligi eýledi. Bu ştatlarda jemi 93 saýlaw sesi eýe bolmak üçin esasy göreş dowam etdi.
“ABŞ-nyň taryhynda iň uly syýasy gaýdyp gelişiň şaýady bolduk” – diýip Trampnyň wise-prezidentlige dalaşgäri Jeý Di Wens belledi.
Respublikançylaryň esasy teleýaýlymy Foxnews-iň habaryna görä, Tramp talap edilýän 270-den 277-i sesi, Kamala Harris – 226 ses aldy.
“Reuters” agentligi Wekiller palatasynyň başlygy Maýk Jonsona salgylanyp, Donald Trampyň ABŞ-nyň saýlanan prezidenti bolandygyny aýtdy. “Associated Press” onuň 267 saýlaw sesiniň bardygyny habar berýär, şol sanlary “Nýu-York Times” hem beýän etdi.
“CNN” we “NBC News”-iň maglumatlary hem esasy “ikirjeňlenýän” Pensilwaniýada Trampyň ýeňiş gazanandygyny aýtýar. Sesleriň 95%-ni gaýtadan işlemegiň netijelerine esaslanyp, Tramp Pensilwaniýa 50%-den gowrak, Harris - 48% ses aldy.
