Biz ýakynlaşmagy ugur edinýäris

11-nji oktýabrda Prezident Serdar Berdimuhamedow Eýranyň, Pakistanyň hem-de Ermenistanyň Prezidentleri bilen ikitaraplaýyn duşuşyk geçirdi.

Türkmenistanyň döwlet Baştutany çakylygy kabul edip, akyldar şahyr Magtymguly Pyragynyň doglan gününiň 300 ýyllygyna bagyşlanyp geçirilýän halkara foruma gatnaşýandyklary üçin minnetdarlyk bildirdi we olar bilen hyzmatdaşlygyň meselelerini ara alyp maslahatlaşdy.

Pursatdan peýdalanyp Türkmenistanyň Prezidenti Masud Pezeşkianini Eýran Yslam Respublikasynyň Prezidenti wezipesine saýlanylmagy bilen ýene-de bir gezek mähirli gutlap, ýokary döwlet wezipesinde uly üstünlikleri arzuw etdi. Dostlukly döwletiň Baştutany EYR-nyň Beýik ruhy lideri Aýatolla Seýed Ali Hoseýni Hameneýiniň mähirli salamyny ýetirdi diýip, TDH habar berýär.

Prezident Serdar Berdimuhamedow EYR-nyň Beýik ruhy liderine iň gowy arzuwlaryny beýan edip, belent mertebeli myhmanyň Eýranyň täze saýlanan Prezidenti hökmünde Türkmenistana ilkinji saparyny amala aşyrýandygyny belledi. Nygtalyşy ýaly, Türkmenistanyň daşary syýasatynda Eýran Yslam Respublikasy bilen hyzmatdaşlyga aýratyn orun degişlidir. Ýurdumyz öz oňyn Bitaraplyk hukuk ýagdaýyndan ugur alyp, EYR bilen dürli ugurlarda netijeli gatnaşyklary alyp barýar.

Duşuşygyň dowamynda ikitaraplaýyn syýasy-diplomatik, söwda-ykdysady, medeni-ynsanperwer gatnaşyklara degişli meseleler, şeýle hem halkara we sebit meseleleri boýunça pikir alşyldy.

Syýasy-diplomatik hyzmatdaşlygyň çäklerinde parlamentara gatnaşyklara möhüm orun degişlidir. Bu ugurda iki ýurduň parlamentara dostluk topary üstünlikli hereket edýär. Söwda-ykdysady hyzmatdaşlyk – Türkmenistan bilen Eýran Yslam Respublikasynyň arasyndaky gatnaşyklarda ileri tutulýan ugurlaryň biridir. Häzirki wagta bu gatnaşyklar durnukly ösdürilýär. Medeni-ynsanperwer ulgamdaky hyzmatdaşlyga esasnam ylym, bilim, saglygy goraýyş, bedenterbiýe we sport ulgamlaryndaky gatnaşyklaryna aýratyn ähmiýet berilýär.

Türkmenistanyň Prezidenti Magtymguly Pyragynyň ýubileýi mynasybetli şu ýylyň maýynda EYR-da bilelikdäki medeni-köpçülikleýin çäreleriň geçirilendigi we dostlukly ýurduň wekilleriniň bu çärelere işjeň gatnaşandygy üçin eýran tarapyna ýene-de bir gezek minnetdarlyk bildirdi.

Pakistan Yslam Respublikasynyň Prezidenti Asif Ali Zardari bilen bilen geçirilen duşuşygyň dowamynda Türkmenistanyň Prezidenti Serdar Berdimuhamedow myhmanyň saparynyň ýurtlarymyzyň arasyndaky hyzmatdaşlygy täze derejelere çykarmakda möhüm ädim boljakdygyna ynam bildirdi.

Türkmenistan bilen Pakistany diňe bir geografik ýakynlyk däl-de, eýsem, çuňňur taryhy kökler, medeniýetleriň we ruhy gymmatlyklaryň umumylygy baglanyşdyrýandygy bellenildi. Biziň ýurtlarymyz köp ýyllaryň dowamynda netijeli hyzmatdaşlyk edip gelýärler we bu hyzmatdaşlyk soňky döwürde depginli ösdürilýär.

Türkmenistan — Owganystan — Pakistan — Hindistan transmilli gaz geçirijisi, Türkmenistan — Owganystan — Pakistan ugry boýunça elektrik geçiriji we optiki-süýümli aragatnaşyk ulgamlary ýaly iri möçberli taslamalaryň bilelikde durmuşa geçirilmegi ikitaraplaýyn netijeli hyzmatdaşlygyň aýdyň mysalydyr. Şu ýylyň sentýabrynda bolsa Türkmenistan agzalan taslamalary Owganystanda iş ýüzünde durmuşa geçirmäge badalga berdi.

Söhbetdeşleriň umumy pikirine görä, açyklyga, özara ynanyşmaga, dostluga esaslanýan iň ýokary döwlet derejesindäki dialog türkmen-pakistan gatnaşyklarynyň ösdürilmeginiň esasy şertidir. Iki döwletiň Baştutanlarynyň birek-birege hormat goýmak esasyndaky yzygiderli gatnaşyklary, şeýle hem döwletara gatnaşyklary pugtalandyrmaga gönükdirilen iri taslamalary, uzak möhlete niýetlenen başlangyçlary ilerletmäge güýçli itergi berýär.

Türkmenistanyň Prezidenti Serdar Berdimuhamedowyň Ermenistan Respublikasynyň Prezidenti Waagn Haçaturýan bilen duşuşygynda döwletara gatnaşyklaryny ösdürmegiň çäklerinde medeni-ynsanperwer ulgamdaky hyzmatdaşlyga aýratyn ähmiýet berilýändigi bellenildi, bu babatda ylym, bilim, bedenterbiýe, sport ulgamlarynda gatnaşyklar ýola goýuldy.

Söwda-ykdysady, ulag-kommunikasiýa, oba hojalygy, syýahatçylyk ulgamlary hyzmatdaşlygyň ileri tutulýan ugurlarynyň hatarynda görkezildi. Bilelikdäki hökümetara toparyň işi döwletara gatnaşyklary işjeňleşdirmekde ähmiýetli orun eýeleýändigi bellenildi. Onuň işi gazanylan ylalaşyklaryň iş ýüzünde durmuşa geçirilmegine, netijeli hyzmatdaşlygyň diwersifikasiýalaşdyrylmagyna we ösdürilmegine gönükdirilendir.

Duşuşykda Prezident Waagn Haçaturýan Prezident Serdar Berdimuhamedowa Magtymguly Pyragynyň ermeni diline terjime edilen goşgular ýygyndysyny sowgat berdi.

ORIENT news

Foto: tdh.gov.tm