Kopengagende syýahatçylar ekologiýa taýdan jogapkärçilikli hereketleri üçin sylaglanarlar

11.07.2024 | 09:25 |

15-nji iýuldan başlap, Daniýanyň Kopengagen şäherinde ekologiýa taýdan jogapkärçilikli hereketleri üçin syýahatçylary sylaglarlar diýip, BBC britan ýaýlyma beriş korporasiýasy habar berýär.

Şeýlelikde, ekologiýa taýdan özüni gowy alyp baran syýahatçylar, ýagny awtoulaglaryň ýerine welosipedli we otluda hereket edýän, şäheri arassalamaga goşant goşýan adamlar mugt muzeýe baryp bilerler, gaýygy kärendesine alyp we hatda mugt naharlanyp bilerler.

Kopengageniň ýolbaşçylarynyň täze başlangyjy «CopenPay» diýlip atlandyrylýar. Ol ekologiýa taýdan jogapkärçilikli özüňi alyp barşy şäher edaralarynyň hyzmatlaryny tölemek üçin özboluşly pul birligine öwürmegi maksat edinýär.

Mysal üçin, galyndylary gaýtadan işleýän täze merkeziň üstünde gurlan «CopenHill» emeli lyža eňňidinde typmak isleýänler welosipedli ýa-da otly bilen ol ýere barsalar, mugt lyžada typyp bilerler.

Daniýanyň Milli galereýasyna plastik galyndylar bilen gelen myhmanlar ony sungat eserine öwürmek boýunça ussatlyk sapagyna gatnaşyp bilerler.

Karen Blikseniň muzeýindäki baglary idetmäge kömek edýän syýahatçylar meşhur ýazyjynyň we ertekiçiniň öňki öýüne mugt girip bilerler.

Ozal şäher suw howdany bolan we ýerasty sergi zalyna öwrülen «Sisternde» myhmanlar diňe pyýada ýa-da welosipedli gelendikleri üçin mugt tanyşdyryş gezelenjine gatnaşyp bilýärler.

— Biz syýahatçylygy ekologiýa düşýän agramdan oňyn özgerişler güýjüne öwürmeli diýip, Daniýanyň paýtagt sebitiniň «Wonderful Copenhagen» syýahatçylyk guramasynyň ýolbaşçysy Mikkel Aaro-Hansen aýtdy.

Kopengageniň sýorfing mekdebi sýorfing okuwyndan soň ýarym sagatlap kenary arassalaýan sýorflere mugt günortanlyk hödürlär.

— Bu we beýleki başlangyçlaryň üstünliklerini görkezmek bilen, biz dünýäniň beýleki şäherleriniň ylham aljakdygyna hem-de syýahatçylaryň has durnukly hereketlerini höweslendirmek üçin öz usullaryny tapjakdygyna umyt edýäris, bu bolsa, ahyrky netijede, biziň ählimiz üçin durnukly geljege alyp barar» — diýip, Hansen belledi.

ORIENT news